കന്നിയങ്കത്തിന്‌ പേരുകുറിച്ച്‌

പുതുക്കാട്

ഒ‍ൗപചാരികതകളില്ല. നാട്ടുകാരിയുടെ പരിചിത ഭാവമാണ്‌ പറപ്പൂക്കര ഡിവിഷനിൽ അന്പിളി വേണുവിന്‌. നാട്ടിടവഴികളിലും വീടുകളിലും വോട്ടർമാരെ നേരിട്ടുകണ്ട്‌ വോട്ടഭ്യർഥിക്കുകയാണ്‌ സ്ഥാനാർഥി. പറപ്പൂക്കര ജില്ലാ പഞ്ചായത്ത്‌ ഡിവിഷന്‌ ഇത്‌ കന്നിയങ്കമാണ്‌, നാട്ടുകാരിയായ അന്പിളിക്കും. പുതിയ മണ്ഡല നിർണയത്തിൽ നിലവിൽ വന്നതാണ്‌ പറപ്പൂക്കര ഡിവിഷൻ. പുതുക്കാട്‌ പഞ്ചായത്തിലായിരുന്നു വെള്ളിയാഴ്‌ച വോട്ടഭ്യർഥിച്ചത്‌. രാവിലെ പുതുക്കാട്‌ ട‍ൗണിൽ കടകളിലും മാർക്കറ്റിലുമെത്തി വോട്ടഭ്യർഥിച്ചു. പുതുക്കാട്‌ അങ്ങാടി, പ്രജ്യോതി നികേതൻ കോളേജ്‌ പരിസരം എന്നിവിടങ്ങളിൽ സ്ഥാനാർഥിയെത്തി. രാവിലെ പുതുക്കാട്‌ സെന്ററിൽ എത്തിയ അന്പിളി വേണുവിനെ ഓട്ടോ ഡ്രൈവർമാർ സ്വീകരിച്ചു. ‘ഇപ്പോഴത്തെ കാലത്ത്‌ അത്‌ പ്രത്യേകം പറയണോ’–എൽഡിഎഫ്‌ സ്ഥാനാർഥികളെ വിജയിപ്പിക്കണമെന്ന അഭ്യർഥനയോട്‌ അവിടെ കൂടിനിന്നവരുടെ പ്രതികരണം ഇതായിരുന്നു. പാതയോരങ്ങളിലെ പച്ചക്കറിക്കടകളിലും ഇറച്ചി മാർക്കറ്റിലും ചായക്കടകളിലും കയറി സ്ഥാനാർഥി വോട്ടഭ്യർഥിച്ചു. എൽഡിഎഫിന്‌ വ്യക്തമായ മേൽക്കൈയുള്ള പ്രദേശമാണ്‌ പറപ്പൂക്കര ഡിവിഷനിലെ മിക്കവാറും പ്രദേശങ്ങൾ. സിപിഐ എം നെല്ലായി ലോക്കൽ കമ്മിറ്റി അംഗവും മഹിളാ അസോസിയേഷൻ കൊടകര ഏരിയ ട്രഷററുമാണ് എൽഡിഎഫ്‌ സ്ഥാനാർഥി അന്പിളി വേണു. 10 വർഷം സിപിഐ എം നെല്ലായി ബ്രാഞ്ച് സെക്രട്ടറിയായിരുന്നു. 2012 മുതൽ പറപ്പൂക്കര പഞ്ചായത്ത്‌ സിഡിഎസ് അംഗം. 2015 ലും 2022 ലും കുടുംബശ്രീ വൈസ് ചെയർപേഴ്സണുമായിരുന്നു. പുതുക്കാട്‌ പഞ്ചായത്തിലെ ഒന്ന്‌, രണ്ട്‌, മൂന്ന്‌ വാർഡുകളിലായിരുന്നു വെള്ളിയാഴ്‌ച സ്ഥാനാർഥിയുടെ ഗൃഹ സന്ദർശനം. വൈകിട്ട്‌ വല്ലച്ചിറ പഞ്ചായത്തിലെ വികസന സദസ്സിലും പങ്കെടുത്തു.