സമരഭൂമിയുടെ മനസ്സുതൊട്ട്‌

തലോർ ‘

എല്ലാവരും ജയിച്ചുവരട്ടെ’–സ്ഥാനാർഥിയുടെ കൈപിടിച്ച്‌ വിജയമാശംസിക്കുന്പോൾ തലോരിലെ ഡേവിസേട്ടന്‌ സന്തോഷം ഉള്ളിലൊതുക്കാനാവുന്നില്ല. ‘ലോട്ടറി വിറ്റാണ്‌ ജീവിതം. ഇ‍ൗ സർക്കാർ തരുന്ന പെൻഷൻ വലിയ ആശ്വാസമാ...നിങ്ങളെല്ലാവരും ജയിച്ചുവരണം’ ജില്ലാ പഞ്ചായത്ത്‌ ആന്പല്ലൂർ ഡിവിഷനിലെ എൽഡിഎഫ്‌ സ്ഥാനാർഥി ഷീല ജോർജിന്റെ പര്യടനത്തിന്റെ തുടക്കത്തിലാണ്‌ ആശംസയുമായി ഡേവിസ്‌ എത്തിയത്‌. നെന്മണിക്കര പഞ്ചായത്തിലെ തലോരിൽനിന്നാണ്‌ ഷീല ജോർജിന്റെ പര്യടനം ആരംഭിച്ചത്‌. രാവിലെ 8.30 ഓടെത്തന്നെ സ്ഥാനാർഥിയെ സ്വീകരിക്കാൻ തലോരിലെ സ്വീകരണ കേന്ദ്രത്തിൽ ആളുകളെത്തിത്തുടങ്ങി. സ്വീകരണ കേന്ദ്രത്തിനു സമീപമുള്ള കടകളിലും സഹകരണ ബാങ്കിലും നീതി മെഡിക്കൽ സ്‌റ്റോറിലും സ്ഥാനാർഥി വോട്ടർമാരെ തേടിയെത്തി. രണ്ടാമത്തെ കേന്ദ്രമായ പാറപ്പുറം കപ്പേളയും പിന്നിട്ട്‌ പാലിയേക്കര ആൽ പരിസരത്തെത്തിയപ്പോൾ വലിയ ജനക്കൂട്ടം സ്ഥാനാർഥിയെ സ്വീകരിക്കാനെത്തി. കളിമൺ വ്യവസായത്തിന്റെയും ടെക്‌സ്‌റ്റൈൽ വ്യവസായത്തിന്റെയും ജില്ലയിലെ പ്രധാന കേന്ദ്രമായിരുന്ന പ്രദേശങ്ങൾ ഉൾപ്പെട്ടതാണ്‌ ആന്പല്ലൂർ ജില്ലാ പഞ്ചായത്ത്‌ ഡിവിഷൻ. കേന്ദ്രസർക്കാരിന്റെ ദ്രോഹ നയം മൂലം താഴുവീണ അളഗപ്പ ടെക്‌സ്‌റ്റൈൽസ്‌ ഉൾപ്പെട്ട മേഖലയിലൂടെയായിരുന്നു ആദ്യദിവസത്തെ സ്ഥാനാർഥി പര്യടനം. തൊഴിലാളികളുടെ അവകാശ സമരങ്ങളുടെ ഉജ്വല പാരന്പര്യമുള്ള മണ്ണിലൂടെയുള്ള പ്രയാണം പ്രദേശത്തെ ഇടതുപക്ഷ ആശയങ്ങളുടെ സ്വാധീനത്തിന്റെ വിളംബരം കൂടിയായി. 26 കേന്ദ്രങ്ങളിലെ സ്വീകരണത്തിനുശേഷം രാത്രി അളഗപ്പനഗർ പഞ്ചായത്തിലെ പുളിഞ്ചോട്ടിലാണ്‌ ഒന്നാംദിവസ പര്യടനം അവസാനിച്ചത്‌. ശനിയാഴ്‌ച രാവിലെ പുതുക്കാട്‌ പഞ്ചായത്തിലെ മാട്ടിൽദേശത്തുനിന്ന്‌ പര്യടനം ആരംഭിച്ച്‌ മറ്റത്തൂർ പഞ്ചായത്തിലെ നാഡിപ്പാറയിൽ അവസാനിക്കും.