ദേശീയപാതയിലെ അശാസ്ത്രീയ
നിർമാണങ്ങൾക്കെതിരെ 
ഉപവാസ സമരം നാളെ

ചാലക്കുടി

ദേശീയപാതയിലെ അശാസ്ത്രീയ നിർമാണങ്ങൾക്കെതിരെ സേവ് കൊരട്ടി നേതൃത്വത്തിൽ വ്യാഴം പകൽ 10 മുതൽ വൈകിട്ട് അഞ്ചുവരെ കൊരട്ടി ജങ്‌ഷനിൽ ഉപവാസ സമരം നടത്തുമെന്ന് ഭാരവാഹികൾ വാർത്താ സമ്മേളനത്തിൽ അറിയിച്ചു. കൊരട്ടിയിൽ പൂർണ രൂപത്തിലുള്ള മേൽപ്പാലം അനുവദിക്കുക, പൊങ്ങം മുതൽ മുരിങ്ങൂർ വരെ തുടർച്ചയായ സർവീസ് റോഡ് നിർമിക്കുക, സർവീസ് റോഡിന്റെയും ചിറങ്ങരയിലെയും മുരിങ്ങൂരിലെയും അടിപ്പാതകളുടെയും നിർമാണം പൂർത്തിയാക്കിയശേഷം മാത്രം കൊരട്ടി മേൽപ്പാലത്തിന്റെ പണികൾ ആരംഭിക്കുക എന്നീ ആവശ്യങ്ങൾ ഉന്നയിച്ചാണ് പ്രതിഷേധ പരിപാടികൾ നടക്കുന്നത്. ഉപവാസ സമരത്തിന്റെ സമാപനത്തോടൊപ്പം ടൗൺ ചുറ്റി പ്രതിഷേധ പ്രകടനവും നടത്തും. കക്ഷിരാഷ്ട്രീയത്തിന് അതീതമായി കൊരട്ടിയുടെ പൊതുവായ നന്മക്കുവേണ്ടി തിരുത്തൽ ശക്തിയായി നിലനിൽക്കുന്ന സന്നദ്ധ കൂട്ടായ്‌മയാണ് സേവ് കൊരട്ടി. കൊരട്ടിയിൽ അടിപ്പാതയല്ല മേൽപ്പാലമാണ് വേണ്ടതെന്ന് തുടക്കം മുതൽ സേവ് കൊരട്ടി ഉന്നയിച്ചിരുന്നുവെന്ന് വാർത്താസമ്മേളനത്തിൽ ചെയർമാൻ തോമസ് നാലപ്പാട്ട്, കൺവീനർ സുന്ദരൻ പനങ്കൂട്ടത്തിൽ, ജോ. കൺവീനർ ഷിജു പ്ളാക്കൽ എന്നിവർ അറിയിച്ചു.