നിർമാണം ഇഴയുന്നു

തൃശൂർ

മണ്ണുത്തി – എറണാകുളം ദേശീയപാതയില്‍ യാത്രക്കാരെ കൊടുംദുരിതത്തിലാക്കി ഗതാഗതക്കുരുക്ക്. കഴിഞ്ഞ വർഷം സെപ്തംബർ 24ന്‌ ആരംഭിച്ച നിർമാണ പ്രവൃത്തി ഒരുവർഷം പിന്നിട്ടിട്ടും പകുതി പോലും പൂർത്തിയാക്കാനായിട്ടില്ല. നിർമാണം ആരംഭിച്ചപ്പോൾ 2025 ഡിസംബറിൽ പൂർത്തിയാക്കുമെന്നാണ്‌ പറഞ്ഞിരുന്നത്‌. യാതൊരു മുൻകരുതലുമില്ലാതെ ദേശീയപാത അതോറിറ്റി അശാസ്‌ത്രീയമായി റോഡ്‌ നിർമാണം ആരംഭിച്ചതാണ്‌ പ്രശ്‌നങ്ങൾക്ക്‌ വഴിവച്ചത്‌. ഗതാഗതം ക്രമീകരിക്കാനുള്ള സർവീസ്‌ റോഡുകളുടെ നിർമാണം നടത്താത്തത്‌ ദുരിതം കൂട്ടി. സർവീസ്‌ റോഡുകളുടെ നിർമാണം പൂർത്തിയാക്കാതെ അഞ്ചിടത്ത്‌ ഒരുമിച്ചാണ്‌ നിർമാണം ആരംഭിച്ചത്‌. ഹൈക്കോടതി ഇടപെടലിനെ തുടർന്ന്‌ നിർമിച്ച സർവീസ്‌ റോഡുകൾക്ക്‌ ആയുസ്‌ ദിവസങ്ങൾ മാത്രമാണ്‌. ടാർ ചെയ്‌തതിനു പിന്നാലെ തകരുന്നത്‌ പതിവുകാഴ്‌ചയാണ്‌. അഞ്ചിടത്തെയും സർവീസ്‌ റോഡ്‌ തകർന്ന്‌ കുഴികൾ രൂപപ്പെട്ടു. കൃത്യമായി നിർമാണ പ്രവർത്തനം നടത്താത്ത ദേശീയപാത അധികൃതർക്ക്‌ നേരെ വലിയ വിമർശനമാണ്‌ ഉയരുന്നത്‌.