നാടെങ്ങും നബിദിനമാഘോഷിച്ചു

തൃശൂർ

ജില്ലയിലെന്പാടും വിശ്വാസി സമൂഹം നബിദിനമാഘോഷിച്ചു. ആഘോഷത്തിന്റെ ഭാഗമായി നബിദിന റാലികൾ, മൗലീദ്​ സദസ്സ്​, മധുര വിതരണം, അന്നദാനം, കലാപരിപാടികൾ തുടങ്ങിയവയുണ്ടായി. വിവിധ മഹല്ലുകളുടെയും മദ്രസകളുടെയും നേതൃത്വത്തിലായിരുന്നു​ പരിപാടികൾ. കൊക്കാല മുസ്​ലിം ജമാഅത്ത്​, ഒളരിക്കര യാസിൻ ജുമാ മസ്ജിദ് മഹല്ല് കമ്മിറ്റി തുടങ്ങിയവയുടെ നേതൃത്വത്തിൽ റാലിയും മൗലീദ്​ സദസ്സും നടന്നു. തിരുവത്ര പുതിയറ ഡി ആർ മദ്രസയുടെ നേതൃത്വത്തിൽ നബിദിനം കൊണ്ടാടി. രാവിലെ ഏഴിന് പുതിയറ ഖത്തീബ് ഹസൻ ലത്വീഫി പതാക ഉയർത്തി. ദഫ്, സ്കൗട്ട്, ഫ്ലവർ ഷോ തുടങ്ങി കലാപരിപാടികളോട് കൂടി നടന്ന നബിദിന സന്ദേശ റാലിക്ക് കമ്മിറ്റി ഭാരവാഹികൾ നേതൃത്വം നൽകി. ഭക്ഷണവിതരണം നടന്നു. കറുകമാട് നുസ്രത്തുൽ ഇസ്‌ലാം മദ്രസയുടെ കീഴിയിൽ നടന്ന നബിദിന ആഘോഷങ്ങൾക്ക് മഹല്ല് പ്രസിഡന്റ്‌ വി മുഹമ്മദ് മോൻ പതാക ഉയർത്തി. കുരഞ്ഞിയൂർ മഹല്ല് ജമാഅത്തിന്റെയും ഖുവത്തുൽ ഇസ്ലാം മദ്രസ സമിതിയുടെയും നേതൃത്വത്തിൽ നബിദിന റാലി സംഘടിപ്പിച്ചു. മഹല്ല് പ്രസിഡന്റ് പണ്ടാറത്തിൽ മുഹമ്മദാലി നേതൃത്വം നൽകി. എടക്കഴിയൂർ അൻസാർ ഇസ്ലാം മദ്രസയിൽ സംഘടിപ്പിച്ച നബിദിനാഘോഷത്തിൽ മാനേജ്മെന്റ്‌ കമ്മറ്റി സീനിയർ വൈസ് പ്രസിഡന്റ്‌ വി പി മൊയ്തു പതാക ഉയർത്തി. മദ്രസ വിദ്യാർഥികളും രക്ഷിതാക്കളും മാനേജ്മെന്റ്‌ , നബിദിനാഘോഷ കമ്മിറ്റി അംഗങ്ങളും പങ്കെടുത്ത നബിദിന ഘോഷയാത്ര നടന്നു.