ആമ്പല്ലൂരിൽ 
ഗതാഗതക്കുരുക്കിന് ശമനമില്ല

ആമ്പല്ലൂർ

അടിപ്പാത നിര്‍മാണം നടക്കുന്ന ദേശീയപാത ആമ്പല്ലൂരിലെ ഗതാഗതക്കുരുക്കിന് ശമനമായില്ല. ഗതാഗതക്കുരുക്ക് ശനിയാഴ്ച രാത്രിയിൽ നന്തിക്കരവരെ നീണ്ടു. തൃശൂര്‍ ഭാഗത്തേക്കായിരുന്നു കുരുക്ക് രൂക്ഷം. ഇതോടെ ഇതുവഴിയുള്ള യാത്രക്കാർ ദുരിതത്തിലായി. അടിപ്പാത നിർമാണം തുടങ്ങിയത് മുതൽ മിക്കദിവസങ്ങളിലും പുതുക്കാട് ആമ്പല്ലൂർ ദേശീയ പാതയിൽ ഇതാണ് സ്ഥിതി എന്നാണ് നാട്ടുകാർ പറയുന്നത്. ഇതോടെ പുതുക്കാട് ബസാര്‍ റോഡിലും സമാന്തര പാതകളിലും വാഹനങ്ങള്‍ നിറഞ്ഞു. റെയില്‍വേ സ്റ്റേഷന്‍ റോഡില്‍ നിന്നും കാഞ്ഞൂപാടം റോഡിലേക്ക് വാഹനങ്ങള്‍ക്ക് ദേശീയപാത മുറിച്ചുകടക്കാന്‍ കഴിയാത്ത സ്ഥിതിയായി. റെയിൽവെ സ്റ്റേഷൻ റോഡിലൂടെയുള്ള ഗതാഗതവും സ്തംഭിച്ചു. ഞായര്‍ രാവിലെയും പകൽ മൂന്നോടെയും കുരുക്ക് തുടരുകയാണ്. പുതുക്കാട് സിഗ്നല്‍ ജങ്ഷനിലും വാഹനങ്ങള്‍ കുരുക്കിൽപ്പെട്ടതോടെ ദേശീയപാത ഏറെക്കുറെ നിശ്ചലമായി. കഴിഞ്ഞ ദിവസം പുതുക്കാട് സര്‍വീസ് റോഡ് അടച്ചുകെട്ടി ഗതാഗത പരിഷ്‌കാരത്തിനു മുതിര്‍ന്നെങ്കിലും ഫലമുണ്ടായില്ല. പാതയിലെ ഗതാഗത പ്രശ്നം ശാസ്ത്രീയമായി പഠിച്ച് ഗതാഗത പരിഷ്‌കരണം നടപ്പാക്കത്തതാണ് പ്രതിസന്ധിയ്ക്ക് കാരണമെന്ന് വിവിധ കോണുകളിൽ നിന്ന് ആരോപണം ഉയരുന്നുണ്ടെങ്കിലും ദേശീയപാത അതോരിറ്റിയുടെ നിസ്സംഗത തുടരുകയാണ്.