ചെണ്ടുമല്ലിയില്‍ 
സ്വപ്‌നം പൂത്തുലഞ്ഞു

പഴയന്നൂര്‍

അത്തമായപ്പോഴേക്കും വെന്നൂര്‍ നീലിപ്പാടം പാറപ്പാറ വീട്ടില്‍ ഷംസുദ്ദീന്റെയും ഭാര്യ ഷബീനയുടെയും മലര്‍വാടി പൂത്തുലഞ്ഞു നില്‍ക്കുകയാണ്. അവരുടെ സ്വപ്നങ്ങളും അതോടൊപ്പം പൂവിട്ടിരിക്കുന്നു. മഞ്ഞയും ചുവപ്പും ചെണ്ടുമല്ലി പൂക്കളാണ് പൂന്തോട്ടം നിറയെ. കുമ്പളക്കോട് ഭജനമഠത്തിന് സമീപം പാട്ടത്തിനെടുത്ത രണ്ടരയേക്കര്‍ കൃഷിയിടത്തില്‍ കൂവയും ബാക്കി ഭാഗത്ത് ചെണ്ടുമല്ലിയുമാണ് ഇവരുടെ കൃഷി. 1400 തൈകള്‍ നട്ടു. എല്ലാം പൂത്തുലഞ്ഞ് നില്‍ക്കുന്ന കാഴ്ച വര്‍ണമനോഹരമാണ്. കിലോയ്ക്ക് 170-–180 രൂപയാണ് നിലവിലെ വിലയെങ്കിലും ഇടനിലക്കാര്‍ ഇവരെ സമീപിക്കുമ്പോള്‍ നേര്‍ പകുതി വിലപോലും പറയുന്നില്ല. അതിനാല്‍ അത്തരക്കാരെ അകറ്റി നിര്‍ത്താനാണ് ഷംസുദ്ദീന്റെ തീരുമാനം. പഴയന്നൂരിലെ കുടുംബശ്രീക്കാര്‍ ഇവരുടെ പൂക്കള്‍ വിപണി വിലയ്‌ക്കെടുക്കാമെന്നാണ് അറിയിച്ചിരിക്കുന്നത്. പൂക്കളുടെ സ്റ്റാള്‍ വയ്ക്കാന്‍ അവസരം ഉണ്ടാക്കാമെന്നും അറിയിച്ചിട്ടുണ്ട്. ഓണമടുക്കുമ്പോള്‍ കിലോയ്ക്ക് 300 രൂപവരെ വില ഉയരാനും സാധ്യതയുണ്ട്. കര്‍ഷകനായ ഷംസുദ്ദീന്‍ ആദ്യമായാണ് ചെണ്ടുമല്ലി കൃഷി ചെയ്യുന്നത്. കൂവയും ചേനയുമായിരുന്നു എല്ലാക്കൊല്ലവും നടാറ്. രണ്ടുമാസം മുമ്പാണ് തൃത്താലയിലെ കുടുംബശ്രീ സംരംഭകരില്‍നിന്ന് ചെണ്ടുമല്ലി തൈകള്‍ വാങ്ങിയത്. കൃഷിയിടത്തിനോട് ചേര്‍ന്ന് ചെറിയൊരു ഷെഡ് കെട്ടി താമസിച്ചാണ് ഇവര്‍ പരിപാലിക്കുന്നത്. കൃഷിയിടത്തില്‍ കാട്ടുപന്നിയുടെ ശല്യം അകറ്റുന്നതിനായി സൗരവേലി കെട്ടിത്തിരിച്ചിട്ടുണ്ട്. പൂന്തോട്ടം കാണാനും പ്രദേശവാസികള്‍ എത്തുന്നതായി ഷംസുദ്ദീന്‍ പറഞ്ഞു. സമീപത്തുള്ള രണ്ടരയേക്കര്‍ കൃഷിയിടം പാട്ടത്തിനെടുത്തെന്നും നെല്‍കൃഷി ആരംഭിക്കാനാണ് തീരുമാനമെന്നും ഷംസുദ്ദീന്‍ അറിയിച്ചു.