ഉപയോഗശൂന്യമായ ടോൾ ബൂത്ത് 
പൊളിച്ചുനീക്കൽ തുടങ്ങി

മുളങ്കുന്നത്തുകാവ്

​വെളപ്പായ റെയിൽവേ മേൽപ്പാലത്തിലെ ഉപയോഗശൂന്യമായ ടോൾ ബൂത്ത് പൊളിച്ചുനീക്കുന്നു. കലക്ടർ അധ്യക്ഷനായ ജില്ലാ വികസന സമിതി യോഗത്തിൽ ടോൾ ബൂത്ത് പൊളിച്ചുനീക്കണമെന്ന്‌ സേവ്യർ ചിറ്റിലപ്പിള്ളി എംഎൽഎ ആവശ്യം ഉന്നയിച്ചിരുന്നു. റോഡ്സ് ആൻഡ് ബ്രിഡ്ജസ് ഡെവലപ്പ്മെന്റ്‌ കോർപറേഷൻ കേരളയുടെ കീഴിലാണ് വെളപ്പായ മേൽപ്പാലം നിർമിച്ചത്. തൃശൂർ മെഡിക്കൽ കോളേജിലേക്കുള്ള മേൽപ്പാലത്തിലെ ടോൾപ്പിരിവ് അവസാനിപ്പിച്ചതോടെ ടോൾ ബൂത്ത് ഉപയോഗശൂന്യമായി. പൊതുമരാമത്ത് വകുപ്പ് നിരത്തുകൾ വിഭാഗം അധികൃതരും ആർബിഡിസികെ അധികൃതരും സംയുക്തമായി സ്ഥലപരിശോധന നടത്തിയാണ്‌ ടോൾ ബൂത്ത് പൊളിച്ചു നീക്കുന്നതിന് ക്വട്ടേഷൻ ക്ഷണിച്ചത്‌. ക്വട്ടേഷന് ആർബിഡിസികെ അംഗീകാരം ലഭിച്ചതോടെയാണ് ടോൾ ബൂത്ത് പൊളിച്ചു നീക്കാനുള്ള നടപടി ആരംഭിച്ചത്. വെളപ്പായ റെയിൽവേ മേൽപ്പാലത്തിന് താഴെയുള്ള ഭാഗം സൗന്ദര്യവൽക്കരിച്ച് വീ പാർക്ക് ഒരുക്കുന്നതിനായി ടൂറിസം വകുപ്പ് 55 ലക്ഷം രൂപ അനുവദിച്ചിട്ടുണ്ട്.