ദേശീയപാതയില്‍ ഫുട്ട്ഓവര് ബ്രിഡ്ജ് നിര്‍മിക്കണം
ദേശീയപാത നിർമാണം നടക്കുന്ന പ്രദേശങ്ങളിൽ നാഷണല്‍ ഹൈവേ പ്രൊജക്ട് ഡയറക്ടര്‍ കെ പ്രവീണ്‍കുമാറും എന്‍ കെ അക്ബര്‍ എംഎല്‍എയും സംയുക്ത പരിശോധന നടത്തുന്നു
ഗുരുവായൂര്‍
ദേശീയപാത കടന്നുപോകുന്ന ഗുരുവായൂര്‍ മണ്ഡലത്തിലെ 11 സ്ഥലങ്ങളില്‍ ഫുട്ട്ഓവര് ബ്രിഡ്ജ് നിര്‍മിക്കുന്നതിന് നടപടി സ്വീകരിക്കണമെന്ന് എന്‍ കെ അക്ബര്‍ എംഎല്‍എ ആവശ്യപ്പെട്ടു. ചാവക്കാട് പൊതുമരാമത്ത് റസ്റ്റ് ഹൗസില്‍ നടന്ന അവലോകനയോഗത്തിൽ നാഷണല്‍ ഹൈവേ പ്രൊജക്ട് ഡയറക്ടര്‍ കെ പ്രവീണ്‍കുമാറിനോടാണ് എന്‍ കെ അക്ബര്‍ ഇക്കാര്യം ആവശ്യപ്പെട്ടത്‌. കാപ്പിരിക്കാട് മുതല്‍ പൊക്കുളങ്ങരവരെയുള്ള പ്രദേശത്തെ ദേശീയപാത നിര്‍മാണവുമായി ബന്ധപ്പെട്ട പരാതികള്‍ പരിഹരിക്കുന്നതിനായാണ്‌ എംഎല്‍എയുടെ അധ്യക്ഷതയില്‍ അവലോകന യോഗം ചേർന്നത്‌. പുന്നയൂര്‍ക്കുളം പഞ്ചായത്തിലെ തങ്ങള്‍പ്പടി, പുന്നയൂര്‍ പഞ്ചായത്തിലെ മന്ദലാംകുന്ന്, പഞ്ചവടി, തെക്കേമദ്രസ, എടക്കഴിയൂര്‍, ചാവക്കാട് നഗരസഭയിലെ കോട്ടപ്പുറം സെന്റര്‍, ചാവക്കാട് ബ്ലോക്ക് പഞ്ചായത്ത് പരിസരം, ഒരുമനയൂര്‍ പഞ്ചായത്തിന്‌ മുന്‍വശം, ഏങ്ങണ്ടിയൂര്‍ പഞ്ചായത്തിലെ പൊക്കുളങ്ങര, ഏത്തായ്, എംഇഎസ് സെന്റര്‍ തുടങ്ങിയ സ്ഥലങ്ങളില്‍ ഫുട്ട്ഓവര് ബ്രിഡ്ജ് നിര്‍മിക്കണമെന്നാണ്‌ ആവശ്യം. ഇക്കാര്യത്തിൽ ദേശീയപാത അതോറിറ്റിയുടെ അനുമതിക്കായി പ്രപ്പോസല്‍ തയ്യാറാക്കി നല്‍കുമെന്ന് പ്രൊജക്ട് ഡയറക്ടര്‍ കെ പ്രവീണ്‍കുമാർ ഉറപ്പുനല്‍കി. മന്ദലാംകുന്ന് ചക്കോലയില്‍ റോഡിന് സമീപ പ്രദേശങ്ങളിലെ വെള്ളക്കെട്ട് ഒഴിവാക്കുന്നതിന് വിദഗ്‌ധ സമിതിയെ രൂപീകരിക്കുന്നതിന് ജില്ലാ കലക്ടറോട് ആവശ്യപ്പെടും. ചാവക്കാട് ടൗണ്‍ മുതല്‍ വില്ല്യംസ് വരെ തകര്‍ന്നുകിടക്കുന്ന ദേശീയപാത പരിശോധിച്ച ശേഷം പിഡബ്ല്യുഡി എന്‍എച്ച് വിഭാഗം നൽകിയ 2.45 കോടി രൂപയുടെ എസ്റ്റിമേറ്റ് പരിഗണിച്ച് തുക അനുവദിക്കാമെന്നും പ്രൊജക്ട് ഡയറക്ടര്‍ അറിയിച്ചു. ചാവക്കാട് നഗരസഭാ ചെയര്‍പേഴ്സണ്‍ ഷീജ പ്രശാന്ത്, പഞ്ചായത്ത് പ്രസിഡന്റുമാരായ ജാസ്മിന്‍ ഷഹീര്‍, ബിന്ദു സുരേഷ്, ടി വി സുരേന്ദ്രന്‍, വിജിത സന്തോഷ് എന്നിവര്‍ സംസാരിച്ചു. ഗുരുവായൂര്‍ നിയോജക മണ്ഡലം പരിധിയില്‍ ദേശീയപാത നിർമാണം നടക്കുന്ന വിവിധ മേഖലയിലെ ജനങ്ങള്‍ നേരിടുന്ന ബുദ്ധിമുട്ടുകള്‍ക്ക് പരിഹാരം കാണാനായി പ്രൊജക്ട് ഡയറക്ടര്‍ കെ പ്രവീണ്‍ കുമാറും എന്‍ കെ അക്ബര്‍ എംഎല്‍എയും സംയുക്ത പരിശോധന നടത്തി.
Tags
Related News
Dont Miss it
0 comments