ഗതാഗതക്കുരുക്ക് നീളുന്നു: കണ്ണടച്ച്‌ ദേശീയപാത അതോറിറ്റി

ആമ്പല്ലൂർ

ദേശീയപാത ആമ്പല്ലൂരിൽ ഗതാഗതക്കുരുക്ക്‌ തുടരുന്പോഴും കണ്ണടച്ച്‌ ദേശീയപാത അതോറിറ്റി അധികൃതർ. ശനി പകൽ 11 മുതൽ ആരംഭിച്ച ഗതാഗതക്കുരുക്ക് രാത്രി 7നും തുടരുകയാണ്. തെക്കോട്ട് ആമ്പല്ലൂർ ജങ്‌ഷൻ മുതൽ പുതുക്കാട് സിഗ്നൽ വരെ ദേശീയ പാതയിലും സർവീസ് റോഡിലും ഗതാഗതം സ്തംഭനാവസ്ഥയിലാണ്. വടക്കോട്ട് മണലി പാലം വരെയും സ്ഥിതി വ്യത്യസ്തമല്ല. അടിപ്പാത നിർമാണം നടക്കുന്ന ആമ്പല്ലൂർ സെന്ററിലെ ഗതാഗതനിയന്ത്രണമാണ് കുരുക്കിന് കാരണം. 2024 സെപ്റ്റംബർ 24 ന് അടിപ്പാത നിർമാണത്തിനായി പ്രധാനപാത പൊളിച്ചുതുടങ്ങിയത് മുതൽ ഈ ഭാഗത്ത് സ്ഥിരം ഗതാഗതക്കുരുക്കാണ്. ദിനം പ്രതി 50,000 ത്തോളം വാഹനങ്ങൾ ആമ്പല്ലൂർ സെന്ററിലൂടെ കടന്ന് പോകുന്നതായാണ് കണക്ക്. ഈ വണ്ടികളെ മുഴുവൻ ഉൾക്കൊള്ളാൻ നിലവിലുണ്ടായിരുന്ന നാലുവരിപ്പാതയ്ക്ക്‌ തന്നെ ബുദ്ധിമുട്ട് ആയിരുന്നു. ഇ‍ൗ സാഹചര്യത്തിൽ ആവശ്യമായ മുന്നൊരുക്കങ്ങൾ നടത്താതെയാണ് അടിപ്പാത നിർമാണം ആരംഭിച്ചതെന്ന് അന്നുതന്നെ ആരോപണം ഉയർന്നിരുന്നു. നിർമാണം ആരംഭിച്ചത് മുതൽ ഗതാഗതക്കുരുക്ക്‌ രൂക്ഷമായിട്ടും ദേശീയപാത അതോറിറ്റി യാതൊരു നടപടിയും സ്വീകരിച്ചിട്ടില്ല. ​അതേ സമയം ടോൾ പിരിക്കാനും നിരക്ക് വർധിപ്പിക്കാനുമുള്ള കന്പനിയുടെ ഹർജിയിൽ ഹൈക്കോടതി വെള്ളിയാഴ്ച വാദം കേൾക്കും. അത്യാവശ്യ ഗതാഗത സൗകര്യങ്ങൾ ഒരുക്കാതെ നടത്തുന്ന ടോൾ പിരിവ് ഓഗസ്റ്റ് 6നാണ് ഹൈക്കോടതി വിലക്കിയത്.