കളറാകാൻ രാമക്കൽമേട്

നെടുങ്കണ്ടം

അടിസ്ഥാനസൗകര്യങ്ങളിലും കാഴ്ചകളിലും കളറാകാനൊരുങ്ങി രാമക്കൽമേട് ടൂറിസം കേന്ദ്രം. ‘ആരവം’ ഓണാഘോഷത്തിന്റെ ഭാഗമായി സംഘടിപ്പിച്ച ടൂറിസം സെമിനാറിൽ വികസന ചർച്ചകൾ മുന്നോട്ടുവച്ചു. എം എം മണി എംഎൽഎ സെമിനാർ ഉദ്‌ഘാടനം ചെയ്‌തു. സെമിനാർ കൺവീനർ വി സി അനിൽ, ഉത്തരവാദിത്വ ടൂറിസം സിഇഒ രൂപേഷ് കുമാർ, ഡിടിപിസി എക്സിക്യൂട്ടീവ് അംഗം ടി എം ജോൺ എന്നിവർ സംസാരിച്ചു. ഡിടിപിസിയുടെ കണക്കനുസരിച്ച് ദിവസവും ആയിരത്തോളം സഞ്ചാരികളെത്തുന്ന കേന്ദ്രമാണ്‌ രാമക്കൽമേട്‌. ഇവിടെ നിരവധി പദ്ധതികൾ ടൂറിസം വകുപ്പ്‌ നടപ്പാക്കിട്ടുണ്ട്. ഭൂമിശാസ്ത്രപരമായും ഐതിഹ്യപരമായും സവിശേഷമായ രാമക്കൽമേടിന്റെ വികസനത്തിന് ക്രിയാത്മക ഇടപെടലുണ്ടാകണമെന്ന്‌ സെമിനാർ വിലയിരുത്തി. സമുദ്രനിരപ്പിൽനിന്ന് 3000 അടി ഉയരത്തിൽ സ്ഥിതിചെയ്യുന്ന രാമക്കൽമേടിന്റെ വിമാനദൃശ്യം(ഫ്ലൈറ്റ് വ്യൂ) മനോഹരമാണ്. സമീപത്തുള്ള ആമപ്പാറ വ്യൂ പോയിന്റും ഓഫ് റോഡ് ജീപ്പ് സവാരിയും സഞ്ചാരികളെ ആകർഷിക്കുന്നവയാണ്‌.