മലങ്കര സമ്പൂര്‍ണ കുടിവെള്ള പദ്ധതി അതിവേഗം

തൊടുപുഴ

മുട്ടം, കരിങ്കുന്നം, കുടയത്തൂർ പഞ്ചായത്തുകളിൽ സമഗ്ര ശുദ്ധജല വിതരണം യാഥാർഥ്യമാക്കുന്ന മലങ്കര സമ്പൂർണ കുടിവെള്ള പദ്ധതി പൂര്‍ത്തീകരണത്തിലേക്ക്. നബാർഡിന്റെയും ജലജീവൻ മിഷന്റെയും സഹകരണത്തില്‍ 2020-ലാണ് പദ്ധതിക്ക് രൂപം നല്‍കിയത്. മലങ്കര ജലാശയത്തിലെ ആറുമീറ്റർ വ്യാസമുള്ള കിണറിൽനിന്നും വെള്ളം മുട്ടം പെരുമറ്റത്ത് എംവിഐപി ഭൂമിയിലെ ജല ശുദ്ധീകരണശാലയിലെത്തിക്കും. ഇവിടെ ശുദ്ധീകരിച്ചശേഷമാകും വിതരണം. മൂലമറ്റത്ത് വൈദ്യുതി ഉൽപ്പാദനത്തിന് ശേഷം മലങ്കരയിലേക്ക് പുറംതള്ളുന്ന വെള്ളമാണ് ശുദ്ധീകരണ പ്ലാന്റിലെത്തുക. മാത്തപ്പാറയിലെ നിലവിലുള്ള പമ്പ്ഹൗസ് നിലനിർത്തി പുതിയ മോട്ടോറുകൾ സ്ഥാപിച്ച് പ്രതിദിനം 11 ദശലക്ഷം ലിറ്റർ വെള്ളം ശുദ്ധീകരിക്കും. ​ അതിവേഗം ജലശുദ്ധീകരണശാലയുടെ വിവിധഘടകങ്ങളായ എയറേറ്റർ, റോ വാട്ടർ ചാനൽ, ഫ്ലാഷ് മിക്‌സർ, ക്ലാരിഫ്‌ ലോക്കുലേറ്റർ, ഫിൽറ്റർ ഹൗസ്, ക്ലിയർ വാട്ടർ ചാനൽ, ക്ലിയർ വാട്ടർ സമ്പ്, ക്ലിയർ വാട്ടർ പമ്പ്ഹൗസ് എന്നിവയുടെ സിവില്‍ ജോലികള്‍ പൂര്‍ത്തിയായെന്ന് അധികൃതര്‍ പറഞ്ഞു. ടൈല്‍, പെയിന്റിങ് ജോലികള്‍ ഭാഗികമായി പൂര്‍ത്തിയാക്കി. ട്രാൻസ്‍ഫോര്‍മര്‍, പമ്പുസെറ്റുകള്‍ എന്നിവ സ്ഥാപിച്ചാലേ ജല ശുദ്ധീകരണശാല പൂര്‍ത്തിയാകൂ. ഇത് ജല്‍ജീവൻ മിഷനില്‍ ഉള്‍പ്പെടുത്തി പുരോഗമിക്കുന്നു. 93 മീറ്റര്‍ നീളത്തില്‍ സംരക്ഷണഭിത്തിയും നിർമിച്ചു.

നബാർഡ് ഫണ്ടിൽനിന്നും ഏകദേശം 18.67 കോടി രൂപ ചെലവഴിച്ചാണ് പദ്ധതി പൂർത്തീകരിക്കുന്നത്. 93.55 കോടിരൂപയാണ് ജലജീവൻ മിഷനിലൂടെ ചെലവഴിക്കുന്നത്. ​ഇഷ്‍ടംപോലെ വെള്ളം പദ്ധതി പൂർത്തിയാകുന്നതോടെ മുട്ടം പഞ്ചായത്തിൽ 1297, കരിങ്കുന്നത്ത്– 2450, കുടയത്തൂരിൽ– 3013 പുതിയ ഗാർഹിക കുടിവെള്ള കണക്ഷനുകൾ നിലവിൽവരും. മൂന്ന് പഞ്ചായത്തുകളിലും 248 കിലോമീറ്റർ വിതരണ ശൃംഖലകൾ സ്ഥാപിക്കും. വെള്ളം ശുദ്ധീകരിച്ച് മുട്ടം പഞ്ചായത്തിലെ എട്ടും കരിങ്കുന്നം, കുടയത്തൂർ പഞ്ചായത്തുകളിലെ ഏഴുവീതം ജലസംഭരണികളിലുമെത്തും. ഇവിടെനിന്നാകും ഗാർഹിക വിതരണം. കുടയത്തൂർ ബ്ലൈൻഡ് സ്‌കൂളിന് സമീപം 2.5ലക്ഷം ലിറ്റർ സംഭരണശേഷിയുള്ള ടാങ്ക് പൂര്‍ത്തിയായി. മോർക്കാട് ബൂസ്റ്റർ 1 ടാങ്കും പൂര്‍ത്തിയായി. കൈപ്പ, അടൂർമല, മോർക്കാട് ടോപ്പ് എന്നിവിടങ്ങളില്‍ ടാങ്ക് നിര്‍മാണം പുരോഗമിക്കുകയാണ്.