നെടുങ്കണ്ടം ഡീലേഴ്സ് കോ- ഓപ്പറേറ്റീവ് സൊസൈറ്റിയിൽ വീണ്ടും പ്രതിഷേധം

നെടുങ്കണ്ടം

നിക്ഷേപത്തുക തിരികെ നല്‍കാത്തതിനെ തുടര്‍ന്ന് ജില്ലാ ഡീലേഴ്സ് കോ- ഓപ്പറേറ്റീവ് സൊസൈറ്റി നെടുങ്കണ്ടം ശാഖയില്‍ വീണ്ടും പ്രതിഷേധം. ചൊവ്വാഴ്ച നിക്ഷേപത്തുക ഭാഗികമായി തിരികെ നല്‍കുമെന്ന് സൊസൈറ്റി അധികൃതര്‍ അറിയിച്ചിരുന്നു. തുടര്‍ന്ന് പണം വാങ്ങാനെത്തിയ നിക്ഷേപകര്‍ സൊസൈറ്റി അധികൃതരുമായി തര്‍ക്കത്തിലേര്‍പ്പെടുകയായിരുന്നു. ഓരോ നിക്ഷേപകര്‍ക്കും 5000- രൂപ വീതം നല്‍കുമെന്നാണ് അറിയിച്ചിരുന്നത്. എന്നാല്‍ സൊസൈറ്റിയിലെത്തിയ നിക്ഷേപകരോട് ഒരുവീട്ടില്‍നിന്ന്‌ ഒരാള്‍ക്കുമാത്രമേ പണം നല്‍കുവെന്ന്‌ അറിയിച്ചതോടെയാണ് തര്‍ക്കമുണ്ടായത്. ശനിയാഴ്ചയും നിക്ഷേപത്തുക തിരികെ ലഭിക്കാത്തതിനാല്‍ ബാങ്കില്‍ പ്രതിഷേധം നടന്നിരുന്നു. തുടര്‍ന്ന്‌ 127 നിക്ഷേപകര്‍ക്കായി 6,35,000 രൂപ തിങ്കളാഴ്ച വിതരണം ചെയ്തു. 14.80 കോടി രൂപയുടെ സാമ്പത്തിക നഷ്ടത്തിന് മുന്‍ ഭരണസമിതി അംഗങ്ങളും ജീവനക്കാരും ഉത്തരവാദികളാണെന്ന് വകുപ്പുതല അന്വേഷണത്തില്‍ കണ്ടെത്തിയിരുന്നു. തുക ഇവരില്‍നിന്നും ഈടാക്കണമെന്നും അന്വേഷകസംഘം ശുപാര്‍ശ ചെയ്‌തു. മുന്‍ ഡിസിസി പ്രസിഡന്റ് ഉള്‍പ്പെടെ 18 പേര്‍ക്ക് സഹകരണസംഘം ജോയിന്റ്‌ രജിസ്ട്രാര്‍ നോട്ടീസ് നല്‍കിയിട്ടുണ്ട്. ഹിയറിങ്‌ നടന്നുകൊണ്ടിരിക്കുകയാണ്‌. അതേസമയം പണം തിരികെ ലഭിച്ചില്ലെങ്കില്‍ എട്ടുമുതല്‍ അനിശ്ചിതകാല സമരം ആരംഭിക്കുമെന്ന്‌ നിക്ഷേപകർ അറിയിച്ചു.