1നെടുങ്കണ്ടത്ത് വീടിനുള്ളില്‍ കുടുങ്ങിയ നാലംഗ കുടുംബത്തെ രക്ഷപ്പെടുത്തി

നെടുങ്കണ്ടം

പേമാരിയെ തുടര്‍ന്നുണ്ടായ മിന്നല്‍ പ്രളയത്തില്‍ നെടുങ്കണ്ടത്ത് വീടിനുള്ളില്‍ കുടുങ്ങിയ നാലംഗ കുടുംബത്തെ സിപിഐ എം പ്രവര്‍ത്തകരും നാട്ടുകാരുംചേര്‍ന്ന് സാഹസികമായി രക്ഷപ്പെടുത്തി. മുണ്ടിയെരുമ പാട്ടത്തില്‍ ബിബി, ഭാര്യ ലിന്‍സി, മക്കളായ ലിയ, നിയ എന്നിവര്‍ക്കിത് രക്ഷാപ്രവര്‍ത്തകരുടെ കരങ്ങളിലൂടെ രണ്ടാംജന്മമാണ്. പാമ്പാടുംപാറ പഞ്ചായത്തംഗവും സിപിഐ എം നെടുങ്കണ്ടം ഏരിയ കമ്മിറ്റിയംഗവുമായ സി വി ആനന്ദ്, മുണ്ടിയെരുമ സ്വദേശികളായ അബ്ദുള്‍ റസാഖ് മൗലവി അല്‍ കാസിമി, കിരണ്‍ ജി കല്ലാര്‍, എം ജി അനീഷ്, സോണി, ജിജി മുല്ലശേരി, ജിന്‍സ് മാത്യു എന്നിവരാണ് രക്ഷാപ്രവര്‍ത്തനം നടത്തിയത്.

ശനി പുലര്‍ച്ചെ രണ്ടോടെയാണ് കല്ലാര്‍ ഡാം തുറക്കുന്ന വിവരം ഇവര്‍ അറിഞ്ഞത്. കല്ലാര്‍പുഴയുടെ വൃഷ്ടിപ്രദേശങ്ങളിലുള്ള ബിബിയോടും മറ്റുള്ളവരോടും ഇക്കാര്യം അറിയിച്ചിരുന്നു. ഡാം തുറന്നയുടന്‍ വൃഷ്ടി പ്രദേശങ്ങളിലെല്ലാം വെള്ളം കയറി. മുണ്ടിയെരുമ ജങ്ഷനില്‍നിന്ന ഇവരോട് എസ്എന്‍ഡിപി യോഗം വനിതാസംഘം പ്രവര്‍ത്തക സരസമ്മയാണ് ബിബിയും കുടുംബവും വീടിനുള്ള കുടുങ്ങിയ വിവരം അറിയിച്ചത്. മുറിക്കുള്ളില്‍ കട്ടിലിനുമുകളില്‍ കസേരയിട്ട് മുകളില്‍ കയറി ഫാനില്‍ പിടിച്ചുനില്‍ക്കുകയായിരുന്നു ഇവര്‍. വീടിന്റെ എയര്‍ഹോളിലൂടെ ശ്വസിച്ചാണ് ഇവര്‍ നിന്നത്. ഉടന്‍തന്നെ സി വി ആനന്ദും സംഘവും സ്ഥലത്തെത്തിയപ്പോള്‍ വെള്ളം കയറി വീട് മൂടാറായിരുന്നു. അഗ്നിരക്ഷാസേനയെ അറിയിച്ചെങ്കിലും എത്താന്‍ വൈകുമെന്ന് അറിയിച്ചപ്പോള്‍ ഇവര്‍ വെള്ളത്തിലിറങ്ങി നീന്തിവീടിന്റെ ടെറസിലെത്തി. തുടര്‍ന്ന് പിക്കാസും ചുറ്റികയും ഉപയോഗിച്ച് എയര്‍ഹോളിനോടുചേര്‍ന്ന് ഇഷ്ടിക പൊട്ടിച്ച് കയര്‍ ഉള്ളിലേക്ക് ഇട്ടുകൊടുത്ത് പുറത്തെടുത്തു. പിന്നീട് നാട്ടുകാരുടെ സഹായത്തോടെ നടപ്പാലമുണ്ടാക്കി രക്ഷപ്പെടുത്തി.