നവകേരളവും ഭൂപതിവ് നിയമ ഭേദഗതി ചട്ടവും– സെമിനാർ

നെടുങ്കണ്ടം

കോന്പയാർ സംസ്കാര പോഷണി വായനശാല ’നവകേരളവും ഭൂപതിവ്നിയമ ഭേദഗതി ചട്ടവും’ സെമിനാർ സംഘടിപ്പിച്ചു. സിപിഐ എം ജില്ലാ സെക്രട്ടറി സി വി വർഗീസ് ഉദ്ഘാടനം ചെയ്തു. ഭൂ പ്രശ്ന‌ങ്ങൾക്ക് ശാശ്വതപരിഹാരമാണ് ഇടതുപക്ഷ സർക്കാർ നേടിയെടുത്തതെന്ന്‌ സി വി വർഗീസ്‌ പറഞ്ഞു. പതിറ്റാണ്ടുകളായി ആത്മീയ- സമുദായ നേതാക്കൾ ആവശ്യപ്പെടുന്ന വിവിധ ക്രിസ്ത്യൻ സഭകളുടെ ദേവാലയങ്ങളും ക്ഷേത്രങ്ങളും, മുസ്ലിം പള്ളികളും പൂർണമായും നിയമപരമായി സർക്കാർ ഉത്തരവിലൂടെ സ്വതന്ത്രമാക്കും. ആരാധനാലയങ്ങൾക്കു പുറമേ സാമുദായിക സംഘടനകളായ എസ്എൻഡിപി, എൻഎസ്എസ് ഉൾപ്പടെ സംഘടനകളുടെ കെട്ടിടങ്ങളും രാഷ്ട്രീയ പാർടികളുടെ ഓഫീസുകളും കോമ്പൗണ്ടിങ് ഫീസില്ലാതെ ക്രമവൽക്കരിക്കപ്പെടും. ജില്ലയിലെ വ്യാപാരികളുടെ കാലങ്ങളായുള്ള ആവശ്യമായ കട്ടപ്പന നഗരത്തിലെ ഷോപ്പ്സൈറ്റുകൾക്ക് പട്ടയം നൽകാൻ സർക്കാർ നടപടി പൂർത്തിയാക്കും. പാറ ക്വാറികൾ തുറന്ന്‌ പ്രവർത്തിപ്പിക്കാൻ അവസരമുണ്ട്‌. രണ്ടാംഘട്ട ചട്ട രൂപീകരണവും കൂടി വരുന്നതോടെ എല്ലാവിധ സ്വാതന്ത്ര്യത്തോടും ജീവിക്കുന്നതിനുള്ള സാഹചര്യം ജില്ലയിലെ ജനങ്ങൾക്ക് കൈവരും. ടൂറിസം രംഗത്ത്‌ ഹോംസ്റ്റേകൾ, ഹോട്ടലുകൾ, പാർക്കുകൾ, ടൂറിസം, പാർക്കിങ് ഏരിയകൾ ഉൾപ്പടെയുള്ളവയ്‌ക്കും നിയസാധുതയാകും. സംസ്ഥാനത്താകെ ബാധകമായ നിയമത്തിൽ സംസ്ഥാന കോൺഗ്രസ്‌ നേതൃത്വം പോലും മൗനം സമ്മതമെന്ന നിലപാടിലാണ്‌. എന്നാൽ‍, ജില്ലയിൽ ഈ നിയമം സങ്കീർണത സൃഷ്‌ടിക്കുമെന്ന്‌ ചില അരാഷ്ട്രീയ സംഘടനകളും കോൺഗ്രസും എതിർപ്പുകളുമായി മുന്നോട്ട് വരുന്നത് രാഷ്ട്രീയ ലക്ഷ്യത്തോടെയണ്‌. ഭൂ പതിവ് നിയമ ചട്ടഭേദഗതിനിയമം സിപിഐ എമ്മിനും ഇടതുപക്ഷത്തിനും നേട്ടമാകുന്നതിൽ വിളറിപൂണ്ടാണ് ഇക്കൂട്ടരുടെ വ്യാജ പ്രചാരണങ്ങൾ. ഭൂ പ്രശ്‌നത്തിന് പരിഹാരം കണ്ടതിനൊപ്പം ജില്ല നേരിടുന്ന ഏറ്റവും വലിയ പ്രതിസന്ധിയായ വന്യജീവി ആക്രമണത്തിനും പരിഹാരവുമായി നിയമഭേദഗതി സർക്കാർ കൊണ്ടുവന്നതോടെ ഇരട്ട നേട്ടമാണുള്ളത്‌. ആക്രമകാരികളായ മൃഗങ്ങളെ അപ്പോൾ തന്നെ വെടിവച്ചു കൊല്ലാൻ ഉത്തരവിടാൻ അനുമതി നൽകുന്ന വന്യജീവി ഭേദഗതി നിയമം ജില്ലയുടെ ജനജീവിതത്തിന് ഒട്ടൊന്നുമല്ല ആശ്വാസം പകരുന്നത്. മലയോര ജനതയെ ഇരുകൈയും നീട്ടി ചേർത്തു പിടിക്കുന്ന രാഷ്ട്രീയ ഉത്തരവാദിത്വമാണ് പിണറായി സർക്കാർ സ്വീകരിച്ചിട്ടുള്ളതെന്നും സി വി വർഗീസ് പറഞ്ഞു. യോഗത്തിൽ സിപിഐ എം ജില്ലാ കമ്മിറ്റിയംഗം പി എൻ വിജയൻ, ക്ലബ്‌ പ്രസിഡന്റ്‌ എൻ ഓമനകുട്ടൻ, സെക്രട്ടറി എസ് മനോജ്, കോൺഗ്രസ്‌ വക്താവ്‌ അഡ്വ. സേനാപതി വേണു, ബിജെപി ദേശീയ സമിതിയംഗം ശ്രീനഗരി രാജൻ, ഉടുന്പൻചോല ലൈബ്രറി ക‍ൗൺസിൽ അംഗം ടി പി ജോസഫ് എന്നിവർ സംസാരിച്ചു.