ചെറുതോണി ടൗൺ റോഡ് നിർമാണത്തിന് 5 കോടി അനുവദിച്ചു: മന്ത്രി റോഷി അഗസ്റ്റിൻ

ചെറുതോണി

ഇടുക്കി വികസന പാക്കേജിൽ ഉൾപ്പെടുത്തി ചെറുതോണിയിൽ റോഡ് വീതികൂട്ടുന്ന പ്രവർത്തനങ്ങള്‍ക്ക് അഞ്ചുകോടി രൂപ അനുവദിച്ചു. മന്ത്രി റോഷി അഗസ്റ്റിനാണ് ഇക്കാര്യം വ്യക്തമാക്കിയത്. ടൗണിനോട് ചേർന്നുള്ള പാറ കീറി നീക്കംചെയ്യാനും ഈ കല്ല് ഉപയോഗിച്ച് മെഡിക്കൽ കോളേജിലേക്കുള്ള സംരക്ഷണ ഭിത്തിയുടെ നിർമാണം പൂർത്തിയാകുന്നതുമാണ് പദ്ധതി. ആദ്യഘട്ടമായി അഞ്ചുകോടി രൂപയുടെ പ്രവർത്തി ഇതിനകം പൂർത്തിയാക്കിയിട്ടുണ്ട്. ഇടുക്കി ഡാമിനോട് ചേർന്ന ഭാഗമായതിനാൽ പാറകീറി നീക്കംചെയ്യാനാണ് അനുമതി നൽകിയിട്ടുള്ളത്. പ്രവർത്തികൾ നടപ്പാക്കുന്നതോടെ ചെറുതോണി ജങ്ഷനിലെ ഗതാഗത കുരുക്ക് പരിഹരിക്കാനും ഓട്ടോ സ്റ്റാൻഡ് പാർക്കിങ് ഏരിയ തുടങ്ങിയവ ക്രമീകരിക്കാനുമാകും. ജില്ലയുടെ അടിയന്തര വികസന പ്രവർത്തനങ്ങൾക്കായി സംസ്ഥാന സർക്കാർ അനുവദിച്ചിട്ടുള്ളതാണ് ഇടുക്കി പാക്കേജ്. സംസ്ഥാന പ്ലാനിങ് ബോർഡിന്റെ അംഗീകാരത്തോടെ കലക്ടറാണ് ജനപ്രതിനിധികളുടെ നിർദേശം കൂടി പരിഗണിച്ച് പ്രവർത്തിക്ക് അനുമതി നൽകിയത്. നിർമാണം പൂർത്തിയായി വരുന്ന ചെറുതോണി പുതിയ ബസ് സ്റ്റാൻഡിന് സമീപം ടി ബി സെന്റർ, എസ്‍പി ഓഫീസ് എന്നിവയുടെ നിർമാണത്തിനുള്ള നടപടികൾ പൂർത്തിയായി. ചെറുതോണി ജങ്ഷനില്‍ ഭാവിയിലുണ്ടാകുന്ന തിരക്കുകൾ കൂടി പരിഗണിച്ചാണ് കൂടുതൽ വീതിയിൽ റോഡ് നിർമിക്കുന്നതെന്നും മന്ത്രി പറഞ്ഞു.