ഐക്യ കുതിപ്പോടെ എല്‍ഡിഎഫ് വിമത പേടിയില്‍ യുഡിഎഫ്

ഇടുക്കി

നാമനിര്‍ദേശ പത്രിക പിന്‍വലിക്കാനുള്ള സമയവും അവസാനിച്ചതോടെ ജില്ല തെരഞ്ഞെടുപ്പിന് തയ്യാര്‍. ആകെ 2795 സ്ഥാനാര്‍ഥികളാണ് മത്സര രംഗത്ത്. 1155 പത്രികകള്‍ പിന്‍വലിച്ചു. സൂഷ്‍മ പരിശോധന പൂര്‍ത്തിയായപ്പോള്‍ 133 പത്രികകള്‍ തള്ളിയിരുന്നു. മുന്നണി കെട്ടുറപ്പിന്റെ പ്രതീകമായാണ് എല്‍ഡിഎഫ് തെരഞ്ഞെടുപ്പിനെ നേരിടുന്നത്. ജില്ലാ പഞ്ചായത്തിലേക്കുള്ള സ്ഥാനാര്‍ഥികളെ വളരെ നേരത്തെ പ്രഖ്യാപിച്ച് മുന്നിലെത്തി. നഗരസഭാ, ബ്ലോക്ക്, പഞ്ചായത്ത് സ്ഥാനാര്‍ഥികളും സജ്ജരായി. കോണ്‍ഗ്രസും 
വിമതരും മറുവശത്ത് വിമതശല്യത്തില്‍ വലയുകയാണ് യുഡിഎഫ്. മുന്നണിയിലെ അനൈക്യം പ്രകടം. സ്ഥാനാര്‍ഥി നിര്‍ണയത്തില്‍ മുന്നണിക്കുള്ളിലും പാര്‍ടികള്‍ക്കുള്ളിലും തമ്മില്‍തല്ല്. ജില്ലാ പഞ്ചായത്ത് അടിമാലി ഡിവിഷൻ സീറ്റ് മുസ്ലിംലീഗ് ചോദിച്ചതാണ് തുടക്കം. തര്‍ക്കം യുഡിഎഫ് സംസ്ഥാന നേതൃത്വം ഇടപെട്ടാണ് പരിഹരിച്ചത്. സ്ഥാനാര്‍ഥികളെ പ്രഖ്യാപിച്ചതോടെ വിമതരുടെ കുത്തൊഴുക്ക്. ജില്ലയിലാകെ 30ലേറെ വിമത സ്ഥാനാര്‍ഥികളുണ്ട് യുഡിഎഫിനെതിരെ. ലീഗും കോണ്‍ഗ്രസും നേരിട്ട് ഏറ്റുമുട്ടുന്നയിടങ്ങള്‍ മൂന്ന്. കോണ്‍ഗ്രസ് ഭാരവാഹികള്‍ തമ്മിലിടഞ്ഞ് മത്സരിക്കുന്നതും ഏറെ.

തൊടുപുഴ നഗരസഭ 10ാം വാര്‍ഡില്‍ മാത്രം മൂന്ന് കോണ്‍ഗ്രസ് വിമതര്‍. കട്ടപ്പന നഗരസഭയില്‍ മുന്‍ ചെയര്‍പേഴ്സണ്‍ ബീന ജോബി ഉള്‍പ്പെടെ അഞ്ച് വിമത സ്ഥാനാര്‍ഥികള്‍. തൊടുപുഴ നഗരസഭയില്‍ ലീഗ് യൂത്ത്‍ലീഗിന് മുന്നില്‍ മുട്ടുമടക്കിയതും കണ്ടു. പകരം യൂത്ത്‍ലീഗ് സ്ഥാനാര്‍ഥിക്കെതിരെ ലീഗ് തന്നെ വിമതനെ മത്സരിപ്പിക്കുന്നുവെന്നാണ് വിവരം. രാജാക്കാട് പഞ്ചായത്ത് ഒമ്പതാംവാര്‍ഡില്‍ മുസ്ലീംലീഗ് ജില്ലാ സെക്രട്ടറി സുധീര്‍ കോട്ടക്കുടി യുഡിഎഫ് വിമതനാണ്. നെടുങ്കണ്ടം പഞ്ചായത്ത് 16ാം വാര്‍ഡില്‍ ലീഗ് ഒറ്റയ്‍ക്ക് മത്സരിക്കുന്നു. ​തുടരുന്ന രാജി -കോൺഗ്രസ്‌ തൊടുപുഴ ബ്ലോക്ക്‌ വൈസ്‌ പ്രസിഡന്റ്‌ സുരേഷ്‌ രാജു പാർടിയിൽനിന്ന്‌ കഴിഞ്ഞദിവസം രാജിവച്ചു. നഗരസഭ 28ാം വാർഡിലെ സ്ഥാനാർഥി നിർണയത്തിൽ കെപിസിസി ജനറൽ സെക്രട്ടറിയുടെയും ബ്ലോക്ക്‌ കോൺഗ്രസ്‌ കമ്മിറ്റി പ്രസിഡന്റിന്റെയും ഏകാധിപത്യ സമീപനത്തില്‍ പ്രതിഷേധിച്ചായിരുന്നു രാജി. വണ്ണപ്പുറം പഞ്ചായത്ത് പ്രസിഡന്റ് കോണ്‍ഗ്രസിന്റെ എം എ ബിജു ബിജെപിയില്‍ ചേര്‍ന്നു. ആളെത്തേടി 
എന്‍ഡിഎ പഞ്ചായത്ത് വാര്‍ഡ്, ബ്ലോക്ക്, മുനിസിപ്പല്‍ തലങ്ങളില്‍ 235 ഇടങ്ങളില്‍ എന്‍ഡിഎയ്‍ക്ക് സ്ഥാനാര്‍ഥികളില്ല. പഞ്ചായത്തുകളില്‍ 185 വാര്‍ഡുകളിലും 40 ബ്ലോക്ക് വാര്‍ഡുകളിലും തൊടുപുഴ, കട്ടപ്പന നഗരസഭകളിലായി 10വാര്‍ഡുകളിലും ആളെക്കിട്ടാനില്ല. എല്‍ഡിഎഫ് മുന്നോട്ട് ചിട്ടയായ പ്രവര്‍ത്തനങ്ങളിലൂടെയും കാമ്പയിനുകളിലൂടെയും എല്‍ഡിഎഫ് സ്ഥാനാര്‍ഥികള്‍ ജനമനസുകളില്‍ ഇടംനേടിക്കഴിഞ്ഞു. സ്ഥാനാര്‍ഥി നിര്‍ണയം മുതല്‍ പാലിച്ച മുന്നണി മര്യാദ ഇതിന് ബലമേകുന്നു. ജനപ്രിയ മുഖങ്ങളെ അണിനിരത്തിയാണ് ഇടതുപക്ഷം തദ്ദേശ സ്ഥാപനങ്ങളുടെ അമരത്തേക്ക് കുതിക്കുന്നത്.