കോണ്‍ഗ്രസിന്റെ കടുംപിടുത്തം ലീഗ് വഴങ്ങിയേക്കും

ഇടുക്കി

ജില്ലാ പഞ്ചായത്ത് തെരഞ്ഞെടുപ്പില്‍ ഡിവിഷൻ സീറ്റ് ആവശ്യപ്പെട്ട ലീഗ് കോണ്‍ഗ്രസിന് മുന്നില്‍ വഴങ്ങാൻ സാധ്യത. അടിമാലി സീറ്റിനായി വാദിച്ച ലീഗിന് അടിമാലി പഞ്ചായത്തില്‍ ഒരു ജനറല്‍ സീറ്റ് ലഭിച്ചേക്കുമെന്നും ഇതിന് ലീഗ് വഴങ്ങുമെന്നുമാണ് സൂചന. അതേസമയം സീറ്റ് വിഭജനത്തിലെ തര്‍ക്കം യുഡിഎഫ് സംസ്ഥാന നേതൃത്വത്തിന് വിട്ടിരിക്കുകയാണ്. സംസ്ഥാന നേതൃത്വം ആവശ്യപ്പെട്ടാല്‍ കോണ്‍ഗ്രസ് ഈ സീറ്റ് വിട്ടുനല്‍കാൻ തയ്യാറാണെന്ന് യുഡിഎഫ് ജില്ലാ നേതൃത്വങ്ങളില്‍നിന്ന് വിവരമുണ്ട്. നേതൃത്വം പറഞ്ഞാല്‍ ചെയ്യാതിരിക്കാൻ പറ്റില്ലല്ലോ എന്നാണ് നിലപാട്. ഇതുവരെ ഇക്കാര്യത്തില്‍ തീരുമാനമായിട്ടില്ല.

സീറ്റ് കൊടുക്കുന്നതില്‍ ചില പ്രായോഗിക ബുദ്ധിമുട്ടുകളുണ്ടെന്നും ഓരോ സീറ്റും ജയിക്കുകയാണ് പ്രധാനമെന്നുമാണ് യുഡിഎഫ് ജില്ലാ ചെയര്‍മാൻ പറഞ്ഞിരുന്നത്. ​ജില്ലാ പഞ്ചായത്തില്‍ കൂടുതലായി വന്ന ഒരു സീറ്റ് ലീഗ് ആവശ്യപ്പെട്ടതോടെയാണ് തര്‍ക്കങ്ങള്‍ തുടങ്ങിയത്. അടിമാലി, കരിമണ്ണൂര്‍ സീറ്റുകളിലൊന്നായിരുന്നു ലീഗ് ഡിമാൻഡ്. എന്നാല്‍ ഇതിന് കോണ്‍ഗ്രസ് സമ്മതിച്ചിരുന്നില്ല. കിട്ടിയേതീരു എന്ന നിലപാടിലാണ് ലീഗ്. അടിമാലിയില്‍ മുമ്പ് ലീഗ് മത്സരിച്ചിട്ടുണ്ട്. നിലവില്‍ കോണ്‍ഗ്രസ് അംഗങ്ങളാണ് അടിമാലിയിലും കരിമണ്ണൂരും ഉള്ളത്. ഇത് വിട്ടുനല്‍കാൻ കോണ്‍ഗ്രസിനും മനസില്ല. അതിനാലാണ് കോണ്‍ഗ്രസ് അടിമാലി പഞ്ചായത്തിലെ ജനറല്‍ സീറ്റ് എന്നൊരു ഉപാധി മുന്നോട്ടുവച്ചിരിക്കുന്നതെന്നാണ് വിവരം. കരിമണ്ണൂര്‍ സീറ്റിനുവേണ്ടി കോണ്‍ഗ്രസിനുള്ളില്‍ തന്നെ ചില കശപിശകളുണ്ട്. വനിതാ സംവരണം ഏറെയുള്ള ജില്ലയില്‍ ലോ റേഞ്ചിലെ ഏക ജനറല്‍ ഡിവിഷനായ കരിമണ്ണൂരില്‍ വീണ്ടും വനിതാ സ്ഥാനാര്‍ഥിയെ നിര്‍ത്തുന്നതിലെ അതൃപ്‍തി പരസ്യമായ രഹസ്യമാണ്. തൊട്ടടുത്ത വണ്ണപ്പുറവും കരിങ്കുന്നവും മൂലമറ്റവും വനിതാ സംവരണ വാര്‍ഡുകളാണ്.