ഹില്ലി അക്വയുടെ ജൈത്രയാത്രയ്‍ക്ക് 10 വയസ്

ഇടുക്കി

സര്‍ക്കാര്‍ കുപ്പിവെള്ളമായ ഹില്ലി അക്വ ജൈത്രയാത്ര ആരംഭിച്ചിട്ട് 10 വര്‍ഷം. മിതമായ വിലയിലും ഉന്നത ഗുണനിലവാരത്തിലും പരിസ്ഥിതി സൗഹൃദമായും കുപ്പിവെള്ളം തയ്യാറാക്കിയാണ് ഹില്ലി അക്വ ജനഹൃദയങ്ങളില്‍ സ്ഥാനം പിടിച്ചത്. ജലവിഭവ വകുപ്പിന്റെ പൊതുമേഖലാ സ്ഥാപനമായ കേരള ഇറിഗേഷന്‍ ഇന്‍ഫ്രാസ്ട്രക്ചര്‍ ഡെവലപ്മെന്റ് കോര്‍പറേഷനാണ് ഹില്ലി അക്വ ഉല്‍പ്പാദിപ്പിക്കുന്നത്. 2015ലാണ് തൊടുപുഴ മലങ്കരയില്‍ ആദ്യ പ്ലാന്റ് സ്ഥാപിച്ചത്. 2021ല്‍ തിരുവനന്തപുരം അരുവിക്കരയിലും പ്ലാന്റ് തുടങ്ങി. കഴിഞ്ഞ സാമ്പത്തിക വര്‍ഷത്തില്‍ (2024- 25) 11.40 കോടിയായിരുന്നു വിറ്റുവരവ്. താലൂക്ക് അടിസ്ഥാനത്തില്‍ 55ലേറെ വിതരണക്കാരുണ്ട് ഹില്ലി അക്വയ്‍ക്ക്. ഒരു ലിറ്ററിന് 10 രൂപയാണ് നിരക്ക്. ​ കടല്‍ കടന്നു റേഷന്‍ കടകള്‍, കണ്‍സ്യൂമര്‍ഫെഡ്(സുജലം പദ്ധതി), റെയില്‍വേ, കെഎസ്ആര്‍ടിസി, കെടിഡിസി, ഫോറസ്റ്റ് ഔട്ട്‍ലെറ്റുകള്‍, നീതി മെഡിക്കല്‍ സ്റ്റോര്‍, ജയിലിലെ ഫ്രീഡം ഭക്ഷണശാലകള്‍, ഫ്രാഞ്ചൈസി ഔട്ട്‌ലെറ്റുകള്‍, കമ്പനി ഔട്ട്‌ലെറ്റുകള്‍ തുടങ്ങി എല്ലായിടത്തും ഹില്ലി അക്വയുടെ സാന്നിധ്യമുണ്ട്. ദക്ഷിണേന്ത്യയില്‍നിന്ന് ജിസിസി രാജ്യങ്ങളിലേക്ക് കുപ്പിവെള്ളം കയറ്റുമതി ചെയ്യുന്ന ആദ്യ കമ്പനിയെന്ന പദവിയും ഹില്ലി അക്വയ്‍ക്ക് സ്വന്തം. യുഎഇ ആസ്ഥാനമായ ആരോഹണ ജനറല്‍ ട്രേഡിങ് എല്‍എല്‍സിക്കാണ് ഇപ്പോള്‍ കയറ്റുമതി. 1.5, അര ലിറ്റര്‍ കുപ്പികളിലായി ഇതിനകം 51,228 ലിറ്റര്‍ വെള്ളം കയറ്റിയയച്ചിട്ടുണ്ട്. അതിര്‍ത്തി ജില്ലകളിലേക്കും വിതരണം വ്യാപിപ്പിക്കും.

ഹരിത കുപ്പിയുടെ നവകേരളം

​പ്ലാസ്റ്റിക് മലിനീകരണം ഒഴിവാക്കാൻ ഹില്ലി അക്വയുടെ നീക്കമാണ് ബയോഡീഗ്രേഡബിള്‍ കുപ്പികളില്‍ ശുദ്ധജല വിതരണം. പോളി ലാക്ടിക് ആസിഡ് കുപ്പികളില്‍ ഉല്‍പ്പാദനം ആരംഭിക്കുന്ന ദക്ഷിണേന്ത്യയിലെ ആദ്യകമ്പനി ഹില്ലി അക്വയാകും. ആദ്യഘട്ടത്തില്‍ 300 മില്ലി ലിറ്റര്‍ കുപ്പിവെള്ളം വിപണിയിലെത്തിച്ച് സ്വീകരണം വിലയിരുത്തിയ ശേഷം മറ്റ് അളവുകളിലും വിപുലീകരിക്കും. ഹരിത കുപ്പിവെള്ളം വിനോദസഞ്ചാര മേഖലകളിലും ശബരിമല, മലയാറ്റൂര്‍ പോലുള്ള തീര്‍ത്ഥാടന കേന്ദ്രങ്ങളിലും ലഭ്യമാക്കാന്‍ ലക്ഷ്യമിടുന്നു. മലങ്കരയ‍്ക്കും അരുവിക്കരയ്‍ക്കും പുറമേ പെരുവണ്ണാമൂഴി, ആലുവ, കട്ടപ്പന എന്നിവിടങ്ങളിലും പുതിയ പ്ലാന്റുകള്‍ ആരംഭിച്ചേക്കും. അരുവിക്കരയില്‍ ഐസ് ക്യൂബ് നിര്‍മാണവും തുടങ്ങും. നിലവില്‍ 60ഓളം ജീവനക്കാരുണ്ട്.