നൊമ്പരക്കാഴ്ച മറക്കാം, പുതിയ ട്രാവലർ സമ്മാനിച്ച്‌ സുഹൃത്തുക്കൾ

നെടുങ്കണ്ടം: കൂട്ടാറ്റിലുണ്ടായ വെള്ളപ്പൊക്കത്തിൽ ഒഴുകിപ്പോകുന്ന ഒരു ട്രാവലർ നൊമ്പരകാഴ്‌ചയായിരുന്നു. മാധ്യമ വാർത്തകളിലൂടെ സംഭവമറിഞ്ഞ സുഹൃത്തുക്കളാണ് ഇവരെ സഹായിക്കാനായി മുമ്പിട്ട് എത്തിയത്. ബംഗളൂരുവിൽ ഐടി കമ്പനി ജീവനക്കാരായ കണ്ണൂർ സ്വദേശികളായ സുബിൻ, അഞ്ജലി എന്നീ സുഹൃത്തുക്കളും പേര് വെളിപ്പെടുത്താൻ ആഗ്രഹിക്കാത്ത മറ്റൊരു സുഹൃത്തും ചേർന്ന് ചൊവ്വ രാവിലെ ട്രാവലർ സമ്മാനിച്ചു. വാഹനം വെള്ളത്തിലൂടെ ഒഴുകി പോകുന്നത് മാധ്യമങ്ങളിലൂടെ അറിഞ്ഞതോടെ നിലവിൽ ഉണ്ടായിരുന്ന മുഴുവൻ ബുക്കിങ്ങുകളും ഇല്ലാതായി.

വാഹനം പുഴയിൽ നിന്നും കരയ്ക്കെത്തിച്ചപ്പോൾ ജീവിതം അവസാനിച്ചതായി തോന്നിയെന്ന് ഡ്രൈവർ സന്തോഷ് പറയുന്നു. എങ്കിലും പുതിയ പ്രതീക്ഷയുടെ സന്തോഷത്തിലാണിവർ. 18 ന് നെടുങ്കണ്ടം മേഖലയിലുണ്ടായ പ്രളയ സമാനമായ മലവെള്ളപ്പാച്ചിലിൽ ‘വിനായക്' എന്ന 17 സീറ്റർ ട്രാവലറാണ് ഒഴുക്കിൽപ്പെട്ട്‌ തകർന്നടിഞ്ഞത്‌. ഫിനാൻസ് വ്യവസ്ഥയിൽ വാങ്ങിയ ഈ വാഹനത്തിന് ഇനിയും അഞ്ചുലക്ഷം രൂപയോളം തിരിച്ചടയ്ക്കാനുണ്ട്. ഉടമയായ ഏളംതറയിൽ റെജിക്കൊപ്പം ഡ്രൈവർമാരായ സന്തോഷും അപ്പുവുമെല്ലാം സന്തോഷത്തിലാണ്‌.