കാലാവസ്ഥ വ്യതിയാനം
നഷ്ടങ്ങളുടെ കയ്‌പ്പറിഞ്ഞ്‌ പാവൽ കർഷകർ
അടിമാലിയിലെ പാവൽകൃഷി
അടിമാലി
വ്യത്യസ്‌ത കാരണങ്ങളാൽ നഷ്ടകണക്കുകളുടെ കയ്‌പ്പറിഞ്ഞ്‌ ഹൈറേഞ്ചിലെ പാവൽ കര്‍ഷകര്‍. കാലാവസ്ഥ വ്യതിയാനം ചെടികളില്‍ രോഗബാധയ്‍ക്ക് ഇടയാക്കുന്നുവെന്നാണ് കര്‍ഷകരുടെ പ്രധാന പരാതി. കൂടാതെ മുന്‍കാലങ്ങളെ അപേക്ഷിച്ച് വിലത്തകര്‍ച്ചയും പ്രധാന വെല്ലുവിളിയാണ്. വിപണിയില്‍ പാവയ്ക്ക ഒരു കിലോക്ക്‌ 80ന് മേൽ വിലയുണ്ടെങ്കിലും ഹൈറേഞ്ചില്‍ കൃഷിയിടത്തില്‍ കര്‍ഷകര്‍ക്ക് ലഭിക്കുന്നതാകട്ടെ 35 രൂപയിലും താഴെ. നാളുകളായി പാവല്‍ കൃഷി ചെയ്യുന്ന കര്‍ഷകരില്‍ പലരും മറ്റ് മേഖലകളിലേക്ക് തിരിയുന്ന സ്ഥിതിയാണ്. ഓരോ വിളവെടുപ്പിലും വില താഴേയ്‌ക്കാണെന്ന് കര്‍ഷകര്‍ പറയുന്നു. ഇടനിലക്കാരുടെ ചൂഷണവും തിരിച്ചടിയാണ്. മറ്റ് പച്ചക്കറികളെ അപേക്ഷിച്ച് പരിപാലന ചെലവ് കൂടുതലാണ് പാവല്‍ കൃഷിക്ക്. തടമെടുത്ത് വിത്തിട്ട് മുളച്ചു പൊങ്ങുമ്പോള്‍ മുതല്‍ വളം പ്രയോഗിക്കണം. പന്തല്‍കെട്ടി പടര്‍ത്തണം. താങ്ങുതൂണുകളിടണം. ജൈവ വളങ്ങളും കീടനാശിനികളും ഉപയോഗിച്ചാണ് കൃഷി നിലനിര്‍ത്തുന്നത്. വളത്തിന് വില വര്‍ധിച്ച സാഹചര്യത്തില്‍ പാവയ്ക്ക 50 രൂപയെങ്കിലും വില കിട്ടിയാലേ പിടിച്ചുനില്‍ക്കാന്‍ കഴിയുകയുള്ളു എന്ന് കര്‍ഷകര്‍ പറയുന്നു. കമ്പോള വിലയുടെ പകുതിപോലും കര്‍ഷകര്‍ക്ക് ലഭിക്കാത്ത സാഹചര്യമുണ്ട്‌.
Tags
0 comments