കാത്ത് ലാബിന് ഇടുക്കി 
പാക്കേജില്‍ 7.5 കോടി

അടിമാലി

താലൂക്ക് ആശുപത്രിക്കായി നിര്‍മിച്ച പുതിയ മന്ദിരം മന്ത്രി വീണാജോർജ്‌ നാടിന്‌ സമർപ്പിച്ചു. ഓണ്‍ലൈനായി നടന്ന പരിപാടി മന്ത്രി ഉദ്ഘാടനം ചെയ്‌തു. ആര്‍ദ്രം പദ്ധതിയില്‍ ഉള്‍പ്പെടുത്തി അനുവദിപ്പിച്ച കിഫ്ബി സഹായത്തോടെ 13.39 കോടി മുടക്കിയാണ് പുതിയ മന്ദിരം യാഥാര്‍ഥ്യമാക്കിയത്. മൂന്ന് നിലകളിലാണ് പുതിയ കെട്ടിടം നിര്‍മിച്ചിട്ടുള്ളത്. കാത്ത് ഐസിസി യു, എക്സറേ യൂണിറ്റുമാണ് അടിനിലയിൽ ക്രമീകരിച്ചിരിക്കുന്നത്‌. ഒന്നും രണ്ടും നിലയില്‍ ഒപി വിഭാഗവും പ്രവര്‍ത്തിക്കും. ഒന്നാം നിലയിൽ ജനറൽ മെഡിസിൻ, ഗൈനക്കോളജി, ഓർത്തോപീഡിക്സ്, രണ്ടാം നിലയിൽ പീഡിയാട്രിക്സ്, ഒഫ്താൽമോളജി, ഡെന്റൽ, ഇഎൻടി, ജനറൽ ഒപി ഫീവർ ക്ലിനിക് എന്നിവയ്ക്കുള്ള മുറികളാണ് സജ്ജമാക്കിയത്. പുതിയ മന്ദിരത്തില്‍ കാത്ത് ലാബിനായി ഇടുക്കി പാക്കേജില്‍ ഉള്‍പ്പെടുത്തി 7.5 കോടി അനുവദിച്ചതായി മന്ത്രി വീണ ജോര്‍ജ് പറഞ്ഞു. കൂടാതെ കാര്‍ഡിയാക് തസ്തികയും അനുവദിക്കും. ആരോഗ്യകേരളം പദ്ധതിയില്‍പെടുത്തി 11 ലക്ഷം മുടക്കി മാമോഗ്രാഫിക് യൂണിറ്റും സജ്ജമാക്കിയിട്ടുണ്ട്. ആശുപത്രി സൂപ്രണ്ട് ഡോ. ടി ഹരിപ്രസാദ് റിപ്പോര്‍ട്ട് അവതരിപ്പിച്ചു. അഡ്വ. എ രാജ എംഎല്‍എ അധ്യക്ഷനായി. ബ്ലോക്ക് പഞ്ചായത്ത് പ്രസിഡന്റ് സോമന്‍ ചെല്ലപ്പന്‍, സര്‍ക്കിള്‍ സഹകരണ യൂണിയന്‍ ചെയര്‍മാന്‍ ടി കെ ഷാജി, ഈറ്റ കാട്ടുവള്ളി, തഴ തൊഴിലാളി ക്ഷേമനിധി ബോര്‍ഡ് ചെയര്‍മാന്‍ ചാണ്ടി പി അലക്സാണ്ടര്‍, സ്ഥിരം സമിതി അധ്യക്ഷരായ സനില രാജേന്ദ്രന്‍, കോയ അമ്പാട്ട് എന്നിവര്‍ സംസാരിച്ചു.