കൂട്ടാറിൽ ഒരുകുടുംബത്തിലെ 
3 പേർക്ക്‌ കടന്നൽകുത്തേറ്റു

നെടുങ്കണ്ടം

കൂട്ടാറിൽ ഒരു കുടുംബത്തിലെ മൂന്നു പേർക്ക് കടന്നലുകളുടെ കുത്തേറ്റു. പുത്തൻപുരക്കൽ ഗിരീഷിനും ഭാര്യക്കും മകനും നേരെയാണ് വീടിന് സമീപം കൂടുകൂട്ടിയ കടന്നലുകളുടെ ആക്രമണമുണ്ടായത്. കടന്നലുകൾ ആക്രമിച്ച വളർത്തുനായകളും ചത്തു. സംഭവത്തിൽ ഗുരുതര പരിക്കേറ്റ ഗിരീഷ് നെടുങ്കണ്ടം താലൂക്ക് ആശുപത്രിയിൽ ചികിത്സയിലാണ്. കഴിഞ്ഞദിവസമാണ് സംഭവം നടന്നത്. ഗിരീഷിന്റെ വീടിന് സമീപത്തായി കടന്നലുകൾ ഒരാഴ്ച മുമ്പ് കൂടുകൂട്ടിയിരുന്നു. വ്യാഴം രാവിലെ കൂട്ടിലുള്ള വളർത്ത് നായകളുടെ കരച്ചിൽ കേട്ടാണ് ഗിരീഷ് പുറത്തേക്കിറങ്ങിയത്. വളർത്തു നായകളെ കൂട്ടമായി കടന്നലുകൾ ആക്രമിക്കുന്നത് കണ്ട് കൂട് തുറക്കുന്നതിനായി എത്തിയ ഗിരീഷിനെയും കടന്നലുകൾ ആക്രമിച്ചു. തുടർന്ന് വീട്ടിനുള്ളിലേക്ക് ഓടിക്കയറിയ ഗിരീഷ് തുണികൊണ്ട് ശരീരം പൊതിഞ്ഞശേഷം വീണ്ടും നായ്ക്കളെ കൂട്ടിൽനിന്നും പുറത്തിറക്കുന്നതിനിടയിൽ വീണ്ടും കുത്തേറ്റു. ഇതിനിടയിൽ ഭാര്യ രശ്മിയും, മകൻ ആദർശും ഗിരീഷിനെ സഹായിക്കുവാനായി എത്തുകയും ഇവർക്കും കുത്തേറ്റു. നായകളെ തുറന്നുവിട്ടശേഷം ഇവർ നെടുങ്കണ്ടത്തെ ആശുപത്രിയിൽ ചികിത്സ തേടി. ഇതിനിടയിൽ കടന്നൽ കുത്തേറ്റ നായകൾ ചത്തു. കടന്നലുകളുടെ ആക്രമണം മൂലം വീടിനുള്ളിൽ പ്രവേശിക്കാനാകാസ്ഥിതിയിലാണ് ഈ കുടുംബം. ഇതേസമയം നാട്ടുകാരുടെ നേതൃത്വത്തിൽ ശനി രാത്രിയിൽ കടന്നൽകൂട് കത്തിച്ചുവെങ്കിലും പുലർച്ചെ വീണ്ടും കടന്നലുകൾ കൂട്ടമായെത്തി. ഇതോടുകൂടി അയൽപക്കത്തുള്ള വീട്ടുകാർക്ക് കൂടി പുറത്തിറങ്ങാൻ പറ്റാത്ത സ്ഥിതിയാണ്. അഗ്നിരക്ഷാസേനയെയയും വനംവകുപ്പിനെയും അറിയിച്ചെങ്കിലും അധികൃതർ സഹായിച്ചില്ലെന്നും നാട്ടുകാർ പറഞ്ഞു.