തോട്ടം തൊഴിലാളികള്‍ സഞ്ചരിച്ച 
ജീപ്പ് തലകീഴെ മറിഞ്ഞു

നെടുങ്കണ്ടം

ഏലത്തോട്ടം തൊഴിലാളികള്‍ സഞ്ചരിച്ചിരുന്ന ജീപ്പ് മറിഞ്ഞ് 16പേര്‍ക്ക് പരിക്ക്. സാരമായി പരിക്കേറ്റ നാലുപേരെ തമിഴ്‌നാട്ടിലെ വിവിധ ആശുപത്രികളില്‍ പ്രവേശിപ്പിച്ചു. മറ്റുള്ളവര്‍ക്ക് നെടുങ്കണ്ടം താലൂക്ക് ആശുപത്രിയില്‍ പ്രാഥമിക ചികിത്സ നല്‍കി. 
 രാവിലെ എട്ടോടെ താന്നിമൂട്- കോമ്പയാര്‍ റോഡില്‍നിന്നും വാസുകുട്ടന്‍പാറ റോഡിലേക്കുള്ള കയറ്റത്തിലാണ് അപകടം. തൊഴിലാളികളെ കുത്തിനിറച്ചെത്തിയ വാഹനം കയറ്റത്തില്‍ നിന്നുപോയി. മുന്നോട്ട് എടുക്കാനുള്ള ശ്രമത്തിനിടയില്‍ തലകുത്തനെ മറിയുകയായിരുന്നു. നെടുങ്കണ്ടം അഗ്നിരക്ഷാസേനയും സമീപത്തുണ്ടായിരുന്ന മണ്ണുമാന്തിയന്ത്രവും ഉപയോഗിച്ചാണ് വാഹനം ഉയര്‍ത്തി തൊഴിലാളികളെ പുറത്തെത്തിച്ചത്. 17-തൊഴിലാളികളും ഡ്രൈവറും ഉള്‍പ്പെടെ 18-പേരായിരുന്നു വാഹനത്തില്‍. തേനി കോംബൈ അടിവാരത്തുനിന്നും എത്തിയവരാണ് അപകടത്തില്‍പ്പെട്ടത്.