ജീവനല്ലേ...രക്ഷപ്പെടുത്താതെ പറ്റുമോ

തൊടുപുഴ
നിലവിളി പോലെ വലിയൊരു ശബ്‍ദം കേട്ടാണ് നോക്കിയത്. ഒരു മനുഷ്യൻ രക്ഷയ്‍ക്കായി കൈ ഉയര്‍ത്തുന്നു. ചാടി, രക്ഷപ്പെടുത്തി. തൊടുപുഴയാറ്റില്‍ ഒഴുക്കില്‍പെട്ടയാളെ രക്ഷപ്പെടുത്തിയ ഗിരിശങ്കര്‍ പറയുന്നു. നടുക്കണ്ടം ചാരപ്പുറത്ത് രാമചന്ദ്രൻ(60) ആണ് അപകടത്തില്‍പ്പെട്ടത്. ബുധൻ പകല്‍ 12ന് ശേഷമാണ് സംഭവം. ആറിന്റെ കടവില്‍ ചൂണ്ടയിടുകയായിരുന്നു മടക്കത്താനം കാഞ്ഞിരത്തിങ്കല്‍ ഗിരിശങ്കര്‍. അപ്പോഴാണ് രാമചന്ദ്രൻ ഒഴുകിവരുന്നത് കാണുന്നത്. ചാടിയെങ്കിലും രക്ഷപ്പെടുത്തല്‍ അത്ര എളുപ്പമല്ലായിരുന്നു. പുഴയുടെ നടുക്കല്ലായിരുന്നു, പക്ഷേ നല്ല ആഴമുണ്ടായിരുന്നു.

വസ്‍ത്രത്തില്‍ പിടിച്ചാണ് കരയിലേക്ക് വലിച്ചടുപ്പിച്ചത്. സമീപത്ത് ഒരു കമുക് മറിഞ്ഞുകിടന്നത് തുണയായി. അതിലേക്ക് അടുപ്പിക്കുകയായിരുന്നു ആദ്യം. പിന്നീട് കരയിലേക്കും. അപ്പോഴേക്കും ആള്‍ അവശനായിരുന്നു. എങ്കിലും ഒരു ജീവൻ രക്ഷിക്കാനായി. കടവിലുണ്ടായിരുന്ന മറ്റ് രണ്ടുപേരായിരിക്കണം അഗ്നിരക്ഷേസേനയില്‍ വിവരമറിയിച്ചിരുന്നു, ഗിരിശങ്കര്‍ പറയുന്നു. വൈകാതെ സേനയെത്തി സിപിആര്‍ നല്‍കി രാമചന്ദ്രനെ സമീപത്തെ സ്വകാര്യ ആശുപത്രിയിലേക്ക് മാറ്റി. ഇയാള്‍ അപകടനില തരണംചെയ്‍തതായാണ് വിവരം. വെങ്ങല്ലൂരിന് സമീപം മണക്കാട് തോട് തൊടുപുഴയാറിലേക്ക് ചേരുന്ന കടവിലായിരുന്നു സംഭവം. തൊടുപുഴയില്‍ സ്വകാര്യ സ്ഥാപനത്തില്‍ ജോലിചെയ്യുകയായിരുന്ന ഗിരിശങ്കര്‍ ഇപ്പോള്‍ വിദേശത്തേക്ക് പോകാനുള്ള തയ്യാറെടുപ്പിലാണ്.