കോൺഗ്രസ്‌ വ്യാജപ്രചാരണം അവസാനിപ്പിക്കണം: 
സി വി വർഗീസ്‌

അടിമാലി

നേര്യമംഗലം വനംവകുപ്പ്‌ റേഞ്ചോഫീസിന് കീഴില്‍ ജനങ്ങളെ കുടിയിറക്കാന്‍ വനംവകുപ്പ് ലിസ്റ്റ് തയ്യാറാക്കിയതായി കോണ്‍ഗ്രസ് വ്യാജ പ്രചാരണം നടത്തുകയാണെന്ന് സിപിഐ എം ജില്ലാ സെക്രട്ടറി സി വി വര്‍ഗീസ് അടിമാലിയില്‍ പറഞ്ഞു. വനഭൂമി പങ്കിടുന്ന പ്രദേശങ്ങളില്‍ വനം, റവന്യൂ സംയുക്ത പരിശോധന പൂര്‍ത്തിയാക്കി കര്‍ഷകര്‍ക്ക് പട്ടയം നല്‍കും. ഇതിനുള്ള പ്രവര്‍ത്തന ങ്ങളാണ് എൽഡിഎഫ്‌സര്‍ക്കാര്‍ നടത്തുന്നത്. ജില്ലയിലെ ഭൂപ്രശ്നങ്ങള്‍ക്ക് നിയമത്തിലൂടെ ശാശ്വത പരിഹാരമായപ്പോള്‍ വ്യാജ പ്രചാരണങ്ങളുമായി കോണ്‍ഗ്രസ് നേതൃത്വം ഇറങ്ങിയിരിക്കുകയാണ്. ഒന്പത്‌ കുടിയിറക്കുകളാണ് ജില്ലയില്‍ കോണ്‍ഗ്രസ് സര്‍ക്കാരുകള്‍ നടത്തിയത്. ഇതിനെ ചെറുത്ത് തോല്‍പ്പിച്ചത് സിപിഐ എമ്മും ഇടതുപക്ഷവുമാണ്. ബിജോ മാണിയാണ് ജില്ലയില്‍ ഭൂപ്രശ്നങ്ങള്‍ക്ക് തുടക്കം കുറിച്ചത്. ജില്ലയില്‍ അനധികൃത നിര്‍മാണങ്ങള്‍ നടക്കുന്നുവെന്ന് വ്യാജ പരാതിയുണ്ടാക്കി വിജിലന്‍സിന് നല്‍കി. ഇതിലൂടെ കേസ് ഹൈക്കോടതിയിലെത്തിച്ചു. കപട പരിസ്ഥിതി സംഘടനകളുടെ ഏജന്റുമാരായി പണം പറ്റുകയാണിവർ. പണം പറ്റിയ ദല്ലാൾമാരാണ് വ്യാജ പ്രചാരണങ്ങള്‍ നടത്തുന്നത്.

വന്യമൃഗങ്ങളുടെ ആക്രമണത്തില്‍ നിന്നും ജനങ്ങളെ സംരക്ഷിക്കുന്നതിനുമുള്ള നിയമം എല്‍ഡിഎഫ് സര്‍ക്കാര്‍ നിയമസഭയില്‍ പാസാക്കി. കര്‍ഷകര്‍ നട്ടൂവളര്‍ത്തിയ മുറിക്കുന്നതിനുള്ള അവകാശവും ഉറപ്പാക്കി. ദേശീയപാത 85 ലെ നിര്‍മാണ നിരോധനവുമായി ബന്ധപ്പെട്ട് നാലിന്‌ സര്‍ക്കാര്‍ ഹൈക്കോടതിയില്‍ സത്യവാങ്മൂലം നല്‍കിയതാണ്. ഇത് കോടതിയുടെ വെബ്സൈറ്റിലും ലഭ്യമാണ്‌. നിജസ്ഥിതി ഇതാണെന്ന് ഇരിക്കേ ജില്ലയിലെ മന്ത്രിയുടെ ഓഫീസിലേയ്ക്ക് കോണ്‍ഗ്രസ് മാര്‍ച്ച് നടത്തുകയായിരുന്നു. അതേസമയം അടിമാലിയില്‍ കോണ്‍ഗ്രസിന്റെ ബി ടീം അക്രമസമരവുമായി ജനങ്ങളെ ദുരിതത്തിലാക്കി. സമരം പൂര്‍ണമായും പാളിയതോടെ പുതിയ വ്യാജ ആരോപണവുമായി രംഗത്തെത്തി. എംപിയും ബിജെപിയുമായുള്ള വലിയ ഗൂഢാലോചന ദേശീയപാത നിര്‍മാണം തടയാൻ ബന്ധപ്പെട്ടുണ്ടായി. അതിന്റെ ഭാഗമായാണ് കരാറുകാരാറുകാരനെയും കക്ഷി ചേര്‍ത്തിട്ടുള്ളത്. മണ്ണ് മറിച്ച് വിൽപ്പന നടത്തുന്നുവെന്ന് വ്യാജ പരാതിയുണ്ടാക്കി. ദേശീയപാതയുടെ നിര്‍മാണം തടയുകയാണ് കോണ്‍ഗ്രസിന്റേയും എംപി യുടേയും ലക്ഷ്യം. ഇത് ജനങ്ങള്‍ തിരിച്ചറിഞ്ഞിട്ടുണ്ട്. കോണ്‍ഗ്രസിനെയും അരാഷ്ട്രീയ സംഘടനകളേയും ജില്ലയിലെ ജനത ഒറ്റപ്പെടുത്തുമെന്നും സി വി വര്‍ഗീസ് പറഞ്ഞു.