സര്‍ക്കാര്‍ എല്ലാ വിഭാഗം ജനങ്ങളെയും ചേര്‍ത്ത് പിടിച്ചു: മന്ത്രി റോഷി

അടിമാലി

എല്ലാ വിഭാഗം ജനങ്ങളെയും ചേര്‍ത്ത് പിടിച്ച സര്‍ക്കാരാണ് സംസ്ഥാന സര്‍ക്കാരെന്നും അതിദരിദ്രര്‍ ഇല്ലാത്ത സംസ്ഥാനമായി നവംബര്‍ ഒന്നിന് പ്രഖ്യാപിക്കപ്പെടുന്ന കേരളം രാജ്യത്തെ ഇതര സംസ്ഥാനങ്ങള്‍ക്ക് മാതൃകയാണെന്നും മന്ത്രി റോഷി അഗസ്റ്റിന്‍. മാങ്കുളം പഞ്ചായത്തില്‍ സംഘടിപ്പിച്ച വികസന സദസ്സും പഞ്ചായത്ത് രജത ജൂബിലി ആഘോഷവും ഉദ്ഘാടനം ചെയ്യുകയായിരുന്നു മന്ത്രി. ചടങ്ങില്‍ മാങ്കുളം ബസ് സ്റ്റാന്റ് നിർമാണവും മന്ത്രി ഉദ്‌ഘാടനം ചെയ്‌തു. ​ ജില്ലാ ആസ്ഥാനത്തെയും മാങ്കുളത്തെയും ബന്ധിപ്പിക്കുന്ന കെഎസ്ആര്‍ടിസി ബസ് സര്‍വീസിനുള്ള നടപടി സ്വീകരിക്കുമെന്നും മന്ത്രി അറിയിച്ചു

. മാങ്കുളം ടൗണില്‍ പഞ്ചായത്തിന്റെ ഉടമസ്ഥതയിലുള്ള സ്ഥലത്ത് 1. 48 കോടി മുടക്കി ബസ് സ്റ്റാന്‍ഡ് നിര്‍മിക്കുന്നത്. ​മാങ്കുളം പഞ്ചായത്ത് അങ്കണത്തില്‍ സംഘടിപ്പിച്ച ചടങ്ങില്‍ ജില്ലാ പഞ്ചായത്ത് പ്രസിഡന്റ് രാരിച്ചന്‍ നീറണാംകുന്നേല്‍ അധ്യക്ഷനായി. മാങ്കുളം പഞ്ചായത്തില്‍ ലൈഫ് ഭവന പദ്ധതിയിലൂടെ പൂര്‍ത്തീകരിച്ച വീടുകളുടെ താക്കോല്‍ദാനം അഡ്വ. എ. രാജ എംഎല്‍എ ഉദ്‌ഘാടനം ചെയ്‌തു. ബ്ലോക്ക് പഞ്ചായത്ത് പ്രസിഡന്റ് ജിഷ ദിലീപ് മുന്‍ ജനപ്രതിനിധികളെ ആദരിച്ചു. മാങ്കുളം പഞ്ചായത്ത് പ്രസിഡന്റ് ഗീത ആനന്ദന്‍, വൈസ് പ്രസിഡന്റ് അനില്‍ ആന്റണി, ജില്ലാ പഞ്ചായത്ത് മെമ്പര്‍ ഭവ്യ കണ്ണന്‍, ബ്ലോക്ക് പഞ്ചായത്ത് മെമ്പര്‍ പ്രവീണ്‍ ജോസ്, മാങ്കുളം, പഞ്ചായത്ത് അംഗങ്ങള്‍ എന്നിവര്‍ സംസാരിച്ചു.