ജമാ അത്തെ ഇസ്ലാമി ബന്ധം: യുഡിഎഫ് 
മറുപടി പറയണം– കെ കെ ജയചന്ദ്രന്‍

അടിമാലി

മതരാഷ്ട്രവാദികളായ ജമാ അത്തെ ഇസ്ലാമിയുടെ രാഷ്ട്രീയ രൂപമായ വെല്‍ഫയര്‍ പാര്‍ടിയുമായുള്ള ബന്ധത്തെ സംബന്ധിച്ച് വി ഡി സതീശനും യുഡിഎഫ് നേതൃത്വവും നിലപാട് വ്യക്തമാക്കണമെന്ന് സിപിഐ എം സംസ്ഥാന സെക്രട്ടറിയറ്റംഗം കെ കെ ജയചന്ദ്രന്‍ പറഞ്ഞു. ദേശാഭിമാനി പത്രത്തിന്റെ വാര്‍ഷിക വരിസംഖ്യ ഏറ്റുവാങ്ങുകയായിരുന്നു അദേഹം. തെരഞ്ഞെടുപ്പിന് മുമ്പ് വെല്‍ഫയര്‍ പാര്‍ടിയെ യുഡിഎഫ് മുന്നണിയിലെടുക്കാനുള്ള നീക്കമാണ് നടക്കുന്നത്. മതമൗലികവാദ സംഘടനകളെ പരസ്യമായി കൂട്ടുപിടിച്ചാണ് കോണ്‍ഗ്രസ് പ്രവര്‍ത്തനം. ജമാഅത്തെ ഇസ്ലാമിയുമായുള്ള യുഡിഎഫിന്റെ പരസ്യ കൂട്ടുകെട്ട് മതനിരപേക്ഷതയ്ക്ക് അപകടമാണ്. ലീഗും ഇസ്ലാം മതവിശ്വാസികള്‍ക്കിടയില്‍ തീവ്ര മത നിലപാടുകള്‍ വളരാന്‍ അവസരം ഒരുക്കുകയാണ് ലീഗ് നേതാവ് കെ എം ഷാജിയില്‍ നിന്നുണ്ടായത്. എല്‍ഡിഎഫ് സര്‍ക്കാര്‍ നാടിന്റെ മതനിരപേക്ഷ പാരമ്പര്യം കാത്ത് സൂക്ഷിക്കുകയാണ്. തുടര്‍ച്ചയായ ഭരണം എല്ലാ മേഖലയിലും സമഗ്രമായ വികസനം ഉറപ്പാക്കി. ആരോഗ്യ, വിദ്യാഭ്യാസ മേഖലകളില്‍ അത്‌ഭൂതപൂര്‍വമായ വളര്‍ച്ചയാണുണ്ടായത്‌. യുഡിഎഫ് അട്ടിമറിച്ച ദേശീയപാത വികസനം എല്‍ഡിഎഫ് സര്‍ക്കാര്‍ യാഥാര്‍ഥ്യമാക്കി.

എണ്‍പത് ശതമാനം നിര്‍മാണ പ്രവര്‍ത്തനങ്ങളും പൂര്‍ത്തിയായി. മലയോര, തീരദേശ ഹൈവേയും പൂര്‍ത്തിയാവുകയാണ്. എല്‍ഡിഎഫ് സര്‍ക്കാരിന്റെ ഇഛാശക്തിയാണ് ഇതിലൂടെ പ്രതിഫലിക്കുന്നത്. ഉന്നത വിദ്യാഭ്യാസ രംഗത്തും വ്യവസായ രംഗത്തും കേരളം കുതിച്ചുയരുകയാണ്. ഇത് തകര്‍ക്കാന്‍ കള്ളപ്രചാരവേലയുമായി യുഡിഎഫും ബിജെപിയും വലതുപക്ഷ മാധ്യമങ്ങളും ഇറങ്ങിത്തിരിച്ചിരിക്കുകയാണ്. എല്‍ഡിഎഫ് സര്‍ക്കാരിന്റെ മൂന്നാം തുടര്‍ഭരണം സാധ്യമാവുകയാണെന്നും കെ കെ ജയചന്ദ്രന്‍ പറഞ്ഞു.