ഒരു ചായേം ഒരു കടീം

സ്വന്തം ലേഖകൻ

തൊടുപുഴ

രാവിലെ ഒരു 10 മുതൽ തൊടുപുഴ കിഴക്കേയറ്റത്ത് നല്ല മൊരിഞ്ഞ പഴംപൊരിയുടെയും ബോണ്ടയുടെയും വടകളുടേയുമൊക്കെ ​ഗന്ധമാണ്. കാര്യമെന്താ?, സൈനറും നിസാറും കട തുറന്നു, അതുതന്നെ. നാവിൽ കൊതിയൂറും ചെറുകടികളുടെ രുചിയൊരുക്കി തൊടുപുഴക്കാരുടെ മനസ്സ്‌ നിറയ്‍ക്കുകയാണ് ഈ സഹോദരങ്ങൾ. 


45 വർഷമായി തൊടുപുഴ ജ്യോതി സൂപ്പർ ബസാറിന് സമീപം തട്ടുകട നടത്തിയിരുന്ന ഇരുവരും കിഴക്കേയറ്റത്ത് സ്വകാര്യ സ്കൂളിന് അടുത്ത് കടയിട്ടിട്ട് രണ്ടുവർഷമാകുന്നു. രാവിലെ മുതൽ ചില്ലലമാര നിറയേ ചെറുകടികളെത്തും. കൂട്ടിന് ചായയും കട്ടനും. ഒരു കടിയും ചായേം. ഇതാണ് കോംബോ. രാത്രി ഏഴുവരെ ഇതിങ്ങനെ തുടരും. പരിപ്പുവട, ഉള്ളിവട, ഉഴുന്നുവട, പത്തിരി, പഴംപൊരി, സുഖിയൻ തുടങ്ങി കടികളേറെയുണ്ടെങ്കിലും ആളുകൾക്ക് പ്രിയം പഴം ബോണ്ടയോടാണ്. എട്ട് രൂപയേ ഈ കടികൾക്കുള്ളു എന്നതാണ് മറ്റൊരു പ്രത്യേകത. സ്‍കൂൾ, കോളേജ് വിദ്യാർഥികളും കച്ചവടക്കാരും തൊഴിലാളികളുമെല്ലാം പതിവുകാരാണ്. പുലർച്ചെ നാലുമുതൽ വിഭവങ്ങൾക്കായി ഒരുക്കങ്ങൾ ആരംഭിക്കും. ഇളയ സഹോദരൻ നിസാറിന്റെ മേൽനോട്ടത്തിൽ തറവാട്ടിലാണ് ഇവ ഉണ്ടാക്കുന്നത്.