താരങ്ങളായി ഗ്രീൻ ചാംപ്‍സ്

തൊടുപുഴ
ഈ വര്‍ഷം പുതിയ ബാഗ് വേണ്ട...ചെരുപ്പും കുടയും യൂണിഫോമും ഒക്കെ കഴിഞ്ഞവര്‍ഷത്തെ മതി... കുട്ടികള്‍ രക്ഷിതാക്കളോട് തീര്‍ത്ത് പറഞ്ഞു. ജില്ലയ്‍ക്ക് അഭിമാനമായി ഗ്രീൻ ചാംപ്‍സ് ജനിക്കുകയായിരുന്നു അവിടെ. പരിസ്ഥിതി ദിനാചരണത്തിന്റെ ഭാഗമായാണ് സ്‍കൂള്‍ വിദ്യാര്‍ഥികളില്‍ പുനരുപയോഗ ശീലം വളര്‍ത്താൻ ജില്ലാ ശുചിത്വമിഷനും തദ്ദേശസ്വയംഭരണ വകുപ്പും ചേര്‍ന്ന് ‘പ്രാക്‍ടീസ് റീയൂസ്, ബി എ ഗ്രീൻ ചാംപ്’ ക്യാമ്പയിൻ തുടങ്ങിയത്. മാലിന്യത്തോത് കുറയ്‍ക്കാനും പരിമിത വിഭവങ്ങളുടെ സംരക്ഷണവും ലക്ഷ്യമായിരുന്നു. അധ്യയന വര്‍ഷത്തിന്റെ തുടക്കത്തില്‍ എല്ലാം പുതിയതെന്ന കാലങ്ങളായ ശീലംമാറ്റാനുറച്ച ക്യാമ്പയിനോട് വിദ്യാര്‍ഥികളും രക്ഷിതാക്കളും ചേര്‍ന്നുനിന്നു. പഴയവ പുനരുപയോഗിക്കുന്നതാണ് യഥാർഥ ചാംപ്യന്മാരുടെ ലക്ഷണമെന്ന സന്ദേശമാണ ക്യാമ്പയിൻ നൽകിയത്.  
വിദ്യാര്‍ഥികള്‍ക്ക് സമ്മാനങ്ങളും സര്‍ട്ടിഫിക്കറ്റുകളും വിതരണംചെയ്‍തു. ജില്ലാതലം വാഴത്തോപ്പ് സെന്റ് ജോര്‍ജ് എച്ച്എസ്എസില്‍ കലക്‍ടര്‍ വി വിഗ്നേശ്വരി ഉദ്ഘാടനംചെയ്‍തു.

സ്‍കൂളില്‍ 160ഓളം വിദ്യാര്‍ഥികളാണ് ക്യാമ്പയിന്റെ ഭാഗമായത്. മൂന്നിലധികം വസ്‍തുക്കള്‍ പുനരുപയോഗിച്ച വിദ്യാര്‍ഥികള്‍ക്ക് ക്യാമ്പയിൻ ലോഗോയും ശുചിത്വ സന്ദേശങ്ങളും പതിച്ച സ്റ്റീല്‍ വാട്ടര്‍ ബോട്ടില്‍ സമ്മാനിച്ചു. ശുചിത്വമിഷൻ ജില്ലാ കോർഡിനേറ്റർ കെ ആര്‍ ഭാഗ്യരാജ്, സ്‌കൂൾ മാനേജർ ഫാ. ടോമി ആനിക്കുഴിക്കാട്ടിൽ, ഹൈസ്‍കൂൾ എച്ച് എം അർച്ചന സ്റ്റാൻലി, ശുചിത്വമിഷൻ പ്രോഗ്രാം ഓഫീസർ അനുമോൾ തങ്കച്ചൻ, അമൽ മാത്യു ജോസ് തുടങ്ങിയവർ പങ്കെടുത്തു. സിഎസ്ആർ ഫണ്ട് സമാഹരിച്ചാണ് ഗ്രീൻ ചാംപ്‍സിന് സമ്മാനങ്ങളും സർട്ടിഫിക്കറ്റുകളും നല്‍കുന്നത്. ഫണ്ട് സമാഹരണം പൂര്‍ത്തിയാക്കി ജില്ലയിലെ മറ്റു സ്ക്കൂളുകളിലെ ഗ്രീൻ ചാംപ്‍സിനും ഇവ വിതരണംചെയ്യും.