മണലിയിൽ കാട്ടാനക്കൂട്ടം വീട് തകർത്തു

വിതുര

മണലിയിൽ ആദിവാസി സ്ത്രീയുടെ വീട് കാട്ടാനക്കൂട്ടം കുത്തി മറിച്ചു. മണലി ആലുംമൂട് കളമൂട്ടുപാറ രാധയുടെ വീടാണ് പൂർണമായും തകർത്തത്. ചൊവ്വാഴ്ച രാത്രിയോടെയായിരുന്നു ആക്രമണം. രാധ ആനകളെ കണ്ട് ഭയന്ന് അടുത്തുള്ള വീട്ടിലേക്ക് മാറിയതിനാല്‍ തലനാരിഴയ്ക്ക് രക്ഷപ്പെട്ടു. വീടിന്റെ തൂണുകളും മേൽക്കൂരയും തകർത്ത ആനക്കൂട്ടം വീട്ടുപകരണങ്ങളും നശിപ്പിച്ചിട്ടുണ്ട്. പഞ്ചായത്ത് പ്രസിഡന്റ്‌ മഞ്ജുഷ ജി ആനന്ദ്, വനം വകുപ്പ് ഉദ്യോഗസ്ഥർ, വില്ലേജ് അധികൃതർ എന്നിവർ സ്ഥലത്തെത്തി പരിശോധന നടത്തി. പ്രദേശത്ത് കാട്ടാന ശല്യം രൂക്ഷമാണെന്നും കിടങ്ങുകൾ ഉൾപ്പെടെയുള്ള സുരക്ഷാ സംവിധാനങ്ങൾ ഒരുക്കണമെന്നും നാട്ടുകാർ ആവശ്യപ്പെട്ടു.