മുദാക്കലിലെ ജലക്ഷാമത്തിന്‌ പരിഹാരം ജല ശുദ്ധീകരണശാല 
നിർമാണം തുടങ്ങി

ആറ്റിങ്ങൽ

മുദാക്കൽ പഞ്ചായത്തിലെയും സമീപ പഞ്ചായത്തുകളിലെയും ജലക്ഷാമത്തിന് പരിഹാരമാകുന്നു. സർക്കാർ കിഫ്ബി വഴി 40.08 കോടി രൂപ ചെലവിട്ട് കരിക്കകം കുന്നിൽ സ്ഥാപിക്കുന്ന സംഭരണശേഷിയുള്ള ജല ശുദ്ധീകരണശാലയുടെയും അനുബന്ധ ഘടകങ്ങളുടെയും നിർമാണോദ്ഘാടനം മന്ത്രി റോഷി അഗസ്റ്റിൻ നിർവഹിച്ചു. വി ശശി എംഎൽഎ അധ്യക്ഷനായി. 60 ലക്ഷം ലിറ്റർ ശേഷിയുള്ള സംഭരണിക്കൊപ്പം അയൺ പൈപ്പ് ഉപയോഗിച്ചിട്ടുള്ള വിതരണ ശൃംഖലയും ഒപ്പം പ്രദേശവാസികളുടെ ദീർഘകാലത്തെ ആവശ്യമായ വാമനപുരം നദിക്ക് കുറുകെയുള്ള തടയണയും പദ്ധതിയുടെ ഭാഗമായി നിര്‍മിക്കും. പദ്ധതി യാഥാർഥ്യമാകുന്നതോടെ വാമനപുരം നദിയിൽനിന്നുള്ള ജലം ശുദ്ധീകരണശാലയിലെത്തിച്ച് ശുദ്ധീകരിച്ച് 2.55 ലക്ഷം ലിറ്റർ സംഭരണശേഷിയുള്ള ഭൂതല സംഭരണിയിലും 19 ലക്ഷം ലിറ്റർ ശേഷിയുള്ള ഉപരിതല സംഭരണിയിലൂടെ നിലവിലുള്ള വിതരണ ശൃംഖല വഴി വിതരണം ചെയ്യും. ഭൂഗർഭ ജലസംഭരണിയിൽനിന്ന്‌ ജലം നിലവിലുള്ള ആര്യൻകുന്ന് ടാങ്കിൽ എത്തിച്ച് അവിടെനിന്ന്‌ നിലവിലുള്ള വിതരണശൃംഖല വഴി വിതരണം ചെയ്യും. പഞ്ചായത്ത് പ്രസിഡന്റ്‌ പള്ളിയറ ശശി, ജല അതോറിറ്റി അംഗം ആർ സുഭാഷ്, ചിറയിൻകീഴ് ബ്ലോക്ക് പഞ്ചായത്ത് പ്രസിഡന്റ്‌ പി സി ജയശ്രീ, ബ്ലോക്ക് പഞ്ചായത്തംഗം കരുണാകരൻ നായർ എന്നിവർ സംസാരിച്ചു.