ശിശുരോഗ വിദഗ്ധരുടെ 
സംസ്ഥാന സമ്മേളനം തുടങ്ങി

തിരുവനന്തപുരം

ശിശുരോഗ വിദഗ്ധരുടെ സംഘടനയായ ഇന്ത്യന്‍ അക്കാദമി ഓഫ് പീഡിയാട്രിക്‌സ് (ഐഎപി) 54–ാം സംസ്ഥാന സമ്മേളനം ‘കേരള പെഡിക്കോണ്‍- 25'ന്‌ ശിൽപ്പശാലകളോടെ തുടക്കമായി. ഐഎപി തിരുവനന്തപുരം ചാപ്റ്ററാണ് സമ്മേളനം സംഘടിപ്പിക്കുന്നത്. തിരുവനന്തപുരം മെഡിക്കല്‍ കോളേജിലും നഗരത്തിലെ ഒമ്പത്‌ ആശുപത്രികളിലുമായി റുമറ്റോളജി, നിയോനാറ്റോളജി, കാര്‍ഡിയോളജി തുടങ്ങിയ വിഷയങ്ങളില്‍ 15 ശില്‍പ്പശാലകള്‍ സംഘടിപ്പിച്ചു. ശില്‍പ്പശാല എസ്എടി ആശുപത്രിയില്‍ ഐഎപി സംസ്ഥാന പ്രസിഡന്റ് ഐ റിയാസ് ഉദ്ഘാടനം ചെ്‌തു. ഐഎപി തിരുവനന്തപുരം ചാപ്റ്റര്‍ പ്രസിഡന്റ് ഡി കല്‍പ്പന അധ്യക്ഷയായി. ഡോക്ടർമാരായ എസ്‌ ഗീത, കെ എസ്‌ പ്രവീണ്‍, ബെന്നോ ആന്‍ഡ്രു, കെ സി ശ്രീജിത്‌കുമാര്‍, വി എച്ച്‌ ശങ്കര്‍, ബെന്നറ്റ് സൈലം തുടങ്ങിയവര്‍ സംസാരിച്ചു. കാര്യവട്ടം ട്രാവന്‍കൂര്‍ ഇന്റര്‍നാഷണല്‍ കണ്‍വന്‍ഷന്‍ സെന്ററില്‍ നടക്കുന്ന സമ്മേളനം ശനി പകൽ 12ന്‌ ആരോഗ്യ ശാസ്ത്ര സര്‍വകലാശാല മുന്‍ വൈസ് ചാന്‍സലര്‍ ഡോ. എം കെ സി നായര്‍ ഉദ്ഘാടനം ചെയ്യും. ഡോ. ഐ റിയാസ് അധ്യക്ഷനാകും. ഐഎപി അഖിലേന്ത്യ സെക്രട്ടറി ജനറല്‍ യോഗേഷ് പരീഖ് മുഖ്യപ്രഭാഷണം നടത്തും. മുതിര്‍ന്ന ശിശുരോഗവിദഗ്ധരെ ആദരിക്കും. മികച്ച ബ്രാഞ്ചിനും മികച്ച ഗവേഷണപ്രബന്ധത്തിനുമുള്ള പുരസ്‌കാരങ്ങളും നൽകും. 1500 ശിശുരോഗ വിദഗ്ധരും 250 പിജി വിദ്യാര്‍ഥികളുമാണ് പങ്കെടുക്കുന്നത്. ആരോഗ്യരംഗത്തെ വിവിധ മേഖലകളെ സമന്വയിപ്പിച്ച് 50 സ്റ്റാളുകളും ഒരുക്കിയിട്ടുണ്ട്.