ശിക്ഷ പ്രോസിക്യൂഷന്റെയും പൊലീസിന്റെയും മികവ്

തിരുവനന്തപുരം

നാടിനെ നടുക്കിയ കേശവദാസപുരം മനോരമ (68) കൊലക്കേസിലെ പ്രതിക്ക് ശിക്ഷ ഉറപ്പാക്കിയത് പ്രോസിക്യൂഷന്റെയും പൊലീസിന്റെയും മികവിൽ. കുറ്റകൃത്യം നടന്ന് 63 ദിവസത്തിനുള്ളിൽ കുറ്റപത്രം കോടതിയിൽ സമർപ്പിച്ചു. കേസിൽ 65 സാക്ഷികളും 30 തൊണ്ടിമുതലും 58 റെക്കോഡുകളും അടക്കം 300 പേജ് വരുന്ന കുറ്റപത്രമാണ് സമർപ്പിച്ചത്. ഭാരതീയ ന്യായസംഹിത 362 വകുപ്പുപ്രകാരം ജീവപര്യന്തവും 50,000 രൂപയും 449 പ്രകാരം 10 വർഷം തടവും 10,000 രൂപ പിഴയും 393 പ്രകാരം ഏഴുവർഷം തടവും 10,000 രൂപ പിഴയും 397 പ്രകാരം ഏഴുവർഷം തടവും 10,000 രൂപ പിഴയും 201 വകുപ്പുപ്രകാരം ഏഴുവർഷം തടവും 10,000 രൂപ പിഴയും എന്നിങ്ങനെയാണ് ശിക്ഷ. തനിക്ക് 24 വയസ്സേ ആയിട്ടുള്ളൂവെന്നും 38 വയസ്സ്‌ കഴിയുമ്പോൾ പുറത്തിറങ്ങുമെന്നുമായിരുന്നു ശിക്ഷാവിധിക്കുശേഷം പ്രതി പ്രതികരിച്ചത്.​