നാവിക ദിനാഘോഷം 40,000 പേർക്ക് കാണാൻ സൗകര്യമൊരുക്കും

തിരുവനന്തപുരം

നാവികസേന ഡിസംബർ 3ന് പകൽ മൂന്നുമുതൽ ശംഖുംമുഖത്ത് സംഘടിപ്പിക്കുന്ന അഭ്യാസ പ്രകടനങ്ങൾ കാണാൻ 40,000 പേർക്ക് സൗകര്യമൊരുക്കും. രാഷ്ട്രപതി ദ്രൗപദി മുർമു മുഖ്യാതിഥിയാകും. നാവികസേനയുടെ പോരാട്ടവീര്യവും കഴിവും പ്രകടിപ്പിക്കുന്ന അഭ്യാസ പ്രകടനങ്ങൾ കാണികൾക്ക് അവിസ്മരണീയമായ അനുഭവമാകും.നാവികസേനാ മേധാവി അഡ്മിറൽ ദിനേശ് കെ ത്രിപാഠിയാണ് പരിപാടിക്ക് ആതിഥേയത്വം വഹിക്കുന്നത്. രാഷ്ട്രപതി എത്തുന്നതിന് ഒരു മണിക്കൂർമുന്പ്‌ വരെയായിരിക്കും പൊതുജനങ്ങൾക്കും വിഐപികൾക്കും പ്രവേശനം അനുവദിക്കുക. സ്വകാര്യ വാഹനങ്ങളിലെത്തുന്ന മറ്റുള്ളവർക്ക് ശംഖുംമുഖത്തേക്ക് പ്രവേശനം അനുവദിക്കില്ല. ഇവർക്ക് നാവികസേനയും പൊലീസും ഏർപ്പെടുത്തിയ പാർക്കിങ്‌ ഗ്രൗണ്ടുകളിൽനിന്ന് കെഎസ്ആർടിസി ഷട്ടിൽ സർവീസ് സജ്ജമാക്കിയിട്ടുണ്ടെന്ന് സിറ്റി പൊലീസ് കമീഷണർ തോംസൺ ജോസ്, നാവികസേന കമാൻഡർമാരായ ഉദയ് അഗർവാൾ,അതുൽ പിള്ള എന്നിവർ വാർത്താസമ്മേളനത്തിൽ അറിയിച്ചു. ചാക്ക, കല്ലുംമൂട്,സ്റ്റേഷൻകടവ്, വലിയതുറ, കുമരിച്ചന്ത, മാധവപുരം എന്നിവിടങ്ങളിൽനിന്ന് ശംഖുംമുഖം, വെട്ടുകാട് ഭാഗത്തേക്ക് പാസ് അനുവദിച്ചിട്ടുള്ള വാഹനങ്ങൾക്ക് മാത്രമേ പ്രവേശനം അനുവദിക്കുകയുള്ളൂ. പാസില്ലാത്തവർ കാര്യവട്ടം, കേശവദാസപുരം, കവടിയാർ,വെള്ളയമ്പലം, പാളയം, കിള്ളിപ്പാലം, ആറ്റുകാൽ, രാണിമുട്ടം, കിഴക്കേകോട്ട, ലുലുമാൾ, വേൾഡ് മാർക്കറ്റ്, കരിക്കകം ക്ഷേത്രം, പുത്തൻതോപ്പ് എന്നിവിടങ്ങളിലെ കേന്ദ്രങ്ങളിൽ വാഹനങ്ങൾ പാർക്ക് ചെയ്തശേഷം കെഎസ്ആർടിസി ബസിൽ പോകണം. പകൽ 1 മുതലും പരിപാടിക്ക് ശേഷവും കെഎസ്ആർടിസി ബസ് ലഭിക്കും. നിശ്ചിത ടിക്കറ്റ് ചാർജ് ഈടാക്കും. പാസുള്ളവർക്ക് 3.30 വരെ ചാക്ക -ആൾസെയിന്റ്സ് വഴി ശംഖുംമുഖത്തെത്തി ആളുകളെയിറക്കി ക്യുആർ കോഡിലുള്ള പാർക്കിങ്‌ ഗ്രൗണ്ടിലേക്ക് പോകാം. പരിപാടി കഴിഞ്ഞ് നേവി ഏർപ്പെടുത്തിയ വാഹനങ്ങളിൽ പാർക്കിങ്‌ ഗ്രൗണ്ടിലെത്തി തിരികെ പോകണം. കാലാവസ്ഥ അനുസരിച്ചും ആളുകൾ കൂടുന്നതിനനുസരിച്ചും കൂടുതൽ നിയന്ത്രണങ്ങൾ ഏർപ്പെടുത്തുമെന്ന് സിറ്റി പൊലീസ് കമീഷണർ പറഞ്ഞു.