കൂടുതൽ ജലം തമിഴ്‌നാട്ടിലേക്ക്‌

തിരുവനന്തപുരം

മുല്ലപ്പെരിയാര്‍ അണക്കെട്ടില്‍ ജലനിരപ്പ് ഉയരുന്ന പശ്ചാത്തലത്തില്‍ കൂടുതല്‍ ജലം തമിഴ്‌നാട്‌ കൊണ്ടുപോകുമെന്ന്‌ മന്ത്രി റോഷി അഗസ്റ്റിന്‍. വെള്ളിയാഴചമുതല്‍ ടണല്‍ വഴി കൂടുതല്‍ ജലം തമിഴ്‌നാട്‌ കൊണ്ടുപോയി തുടങ്ങിയതായും മന്ത്രി അറിയിച്ചു. പരമാവധി സംഭരണശേഷിയായ 142 അടിയാണ് റൂള്‍ കര്‍വ്. എന്നാൽ ജലനിരപ്പ് 140 അടിയില്‍ നിലനിര്‍ത്തുന്നതിനായി കൂടുതല്‍ ജലം കൊണ്ടുപോകണമെന്ന്‌ ആവശ്യപ്പെട്ട്‌ കേരളം കത്തയച്ചതിനെ തുടർന്നാണ്‌ നടപടി. അപ്രതീക്ഷിതമായി മഴ പെയ്ത്‌ ജലനിരപ്പ് പെട്ടെന്ന് ഉയരാനുള്ള സാഹചര്യം തടയുന്നതിനാണ് കേരളം കത്തയച്ചത്. കൂടുതല്‍ ജലം കൊണ്ടുപോയി തുടങ്ങിയതോടെ ജലനിരപ്പ് 140 അടിയിലേക്ക് താഴുന്ന സ്ഥിതിയാണുള്ളത്. ഒക്ടോബര്‍ 17ന് രാത്രിയില്‍ പെയ്ത തീവ്ര മഴയില്‍ അഞ്ചുമണിക്കൂര്‍കൊണ്ട് നാലടിയില്‍ അധികജലം ഉയര്‍ന്ന പശ്ചാത്തലത്തില്‍ കൂടിയാണ്‌ കേരളത്തിന്റെ നീക്കം. അന്ന് 132.90 അടിയില്‍നിന്ന് 137 അടിയായാണ് ജലനിരപ്പ് ഉയര്‍ന്നത്.