നെയ്യാറ്റിൻകരയിൽ ഭരണത്തുടർച്ച 
ഉറപ്പിച്ച് എൽഡിഎഫ്

നെയ്യാറ്റിൻകര

കഴിഞ്ഞ 10 വർഷത്തെ വികസനനേട്ടങ്ങൾ നിരത്തി വീണ്ടും ഭരണത്തുടർച്ചയ്ക്കായി നെയ്യാറ്റിൻകര നഗരസഭയില്‍ എല്‍ഡിഎഫ്. 46 വാർഡുകളിലും പ്രചാരണങ്ങളില്‍ സ്ഥാനാർഥികൾ ബഹുദൂരം മുന്നില്‍. ഗ്രൂപ്പ്കളികളിലും സീറ്റ് മോഹത്തിലും ഐക്യം തകര്‍ന്നാണ് യുഡിഎഫ്. പല വാർഡുകളിലും വിമതശല്യം രൂക്ഷമായി തര്‍ക്കം തുടരുകയാണ്. സ്ത്രീകൾക്കെതിരെയുള്ള അതിക്രമങ്ങളില്‍ മുതിർന്ന കോൺഗ്രസ് നേതാക്കള്‍ കുറ്റാരോപിതരായ സാഹചര്യത്തില്‍ പല വാർഡുകളിലും മുതിര്‍ന്ന വനിതാ നേതാക്കള്‍ പോലും പാർടി വിട്ടു. സ്ത്രീ സംവരണ സീറ്റുകളിൽ സ്ഥാനാർഥികള്‍ക്കൊപ്പം പ്രചാരണത്തിന് ഇറങ്ങാനാളില്ല. സീറ്റുതർക്കം രൂക്ഷമായ പ്ലാവിള വാർഡിൽ കോൺഗ്രസ് പ്രവര്‍ത്തകര്‍ സ്വതന്ത്ര സ്ഥാനാർഥിക്കൊപ്പമാണ്. കൃഷ്ണപുരം വാർഡിലും സീറ്റുതർക്കത്തിൽ കോൺഗ്രസ് പ്രവർത്തകർ ബിജെപിക്കായാണ് പ്രവര്‍ത്തനം. കൃഷ്ണപുരത്തെ കോൺഗ്രസ് വാർഡ് പ്രസിഡന്റ് ബിജെപി സ്ഥാനാർഥിയായിട്ടാണ് മത്സരിക്കുന്നത്. വോട്ടുകച്ചവടത്തില്‍ ബിജെപിലും നീക്കം ശക്തമാണ്. വഴുതൂർ വാർഡിൽ പേരിന് മാത്രമാണ് ബിജെപി സ്ഥാനാര്‍ഥിയെ നിര്‍ത്തിയത്. കോണ്‍ഗ്രസിനായി വോട്ടുമറിക്കുകയാണ്. ആലംപൊറ്റ വാർഡിൽ സ്വതന്ത്ര സ്ഥാനാർഥിയെ നിർത്തിയാണ് വോട്ട് കച്ചവടം. മുന്‍ ഭരണസമിതിയുടെ വികസനങ്ങളും ചിട്ടയോടും കൃതൃതയോടെയുമുള്ള പ്രചാരണവും എൽഡിഎഫിനും സ്ഥാനാര്‍ഥികള്‍ക്കും വലിയ ആത്മവിശ്വാസമാണ് നല്‍കുന്നത്. ചുവരെഴുത്തും പോസ്റ്റർ പ്രചാരണങ്ങളും വാർഡ്, ബൂത്തുതല കൺവൻഷനുകളും പൂർത്തിയായി. സ്ഥാനാർഥികൾ ഭവന സന്ദർശനം അ‍ഞ്ചാം റൗണ്ടിലേക്ക് കടക്കുകയാണ്.