ദീപമാകാൻ ദീപിക

തിരുവനന്തപുരം

യുഡിഎഫ്‌ അംഗത്തിന്റെ അഴിമതിയും വികസനമില്ലായ്മയും കണ്ടുമടുത്ത കുറവൻകോണം വാർഡിലെ ജനങ്ങൾ എൽഡിഎഫ്‌ സ്ഥാനാർഥി ദീപിക ആർ നായരെ ചേർത്തുപിടിക്കുകയാണ്‌. കഴിഞ്ഞ 15 വർഷമായി തുടരുന്ന അനാസ്ഥകൾക്ക് ഇനിയൊരു മാറ്റം വേണമെന്ന് ഉറച്ച ശബ്ദത്തിൽ അവർ പറയുന്നു. ‘മോള്‌ ജയിച്ചേ മതിയാകൂ. ഞങ്ങൾക്കും വേണ്ടേ വികസനം. കഴിഞ്ഞ 15 വർഷമായി യുഡിഎഫിന്റെ അഴിമതി കണ്ടുമടുത്തു’ – പ്രചാരണവേളയിൽ വോട്ടർമാർ ഒറ്റക്കെട്ടായി പറയുന്നതിങ്ങനെയാണ്‌. വ്യാഴം ഉച്ചയ്ക്കുശേഷം വീടുകൾ കയറിയുള്ള പ്രചാരണത്തിൽ, ചായക്കടകളിലും ബസ്‌ സ്റ്റോപ്പുകളിലുംവച്ച്‌ നാട്ടുകാർ ദീപികയെ സ്നേഹത്തോടെ വിളിച്ചുചേർത്തു. ഇടതുപക്ഷ വിദ്യാർഥി–യുവജന പ്രസ്ഥാനങ്ങളിൽ പ്രവർത്തിച്ചിരുന്ന ദീപിക, നാടിന്റെ നീറുന്ന ബുദ്ധിമുട്ടുകൾ കണ്ടാണ്‌ വളർന്നത്‌. പൊതുപ്രവർത്തനത്തിലെ ഇ‍ൗ ദീർഘകാല പരിചയം അവർക്ക് കരുത്തേകുന്നുണ്ട്‌. നാടിന്റെ നാനാവിഷയങ്ങളിലും ഇടപെട്ട്‌ നാട്ടുകാർക്ക്‌ പരിചിതയുമാണ്‌. സ്പോർട്‌സ്‌ കൗൺസിലിൽ ഫിറ്റ്‌നസ്‌ ട്രെയിനർ എന്ന നിലയിലും പ്രവർത്തിച്ചിട്ടുണ്ട്‌. കുടിവെള്ള പ്രശ്നം ഇന്നും കുറവൻകോണം വാർഡിനെ അലട്ടുന്നുണ്ട്‌. ഹെൽത്ത്‌ സെന്ററോ അങ്കണവാടിയോ ഇല്ലാത്തത് ലജ്ജാകരമായി നാട്ടുകാർ ഓർക്കുന്നു. വാർഡിലുള്ള മൂന്ന്‌ കുളങ്ങൾ നവീകരിക്കാനോ കൃത്യമായി പരിചരിക്കാനോ യുഡിഎഫ്‌ അംഗം തയ്യാറായില്ല. വികസനം ഉണ്ടാകുന്നുണ്ടെങ്കിൽ അത്‌ എംഎൽഎ ഫണ്ട്‌ ഉപയോഗിച്ച്‌ മാത്രമാണെന്നും കോർപറേഷൻ പദ്ധതികൾ നടപ്പാക്കാൻ നിലവിലുള്ള അംഗം ശ്രമിക്കുന്നില്ലെന്നും ജനങ്ങൾ ഒന്നടങ്കം സാക്ഷ്യപ്പെടുത്തുന്നു. അഴിമതിയുടെ ഇരുട്ട് മായ്ക്കാൻ, വികസനത്തിന്റെ വെളിച്ചം കൊണ്ടുവരാൻ ദീപിക ആർ നായർക്ക് വോട്ട് നൽകാൻ ഒരുങ്ങുകയാണ് കുറവൻകോണം.