​പ്രകൃതിയെ പരിചയപ്പെട്ട് ഗിഫ്റ്റഡ് സ്റ്റുഡന്റ്‌സ്

തിരുവനന്തപുരം

ആറ്റിങ്ങൽ, തിരുവനന്തപുരം വിദ്യാഭ്യാസ ജില്ലകളിലെ ഗിഫ്റ്റഡ് സ്റ്റുഡന്റ്‌സിന് ജൈവവൈവിധ്യത്തെക്കുറിച്ച് സമഗ്രമായ അറിവ് നൽകുന്ന ‘പ്രകൃതിയോടൊപ്പം ഒരു അറിവുദിനം’ പരിപാടി നടത്തി. വള്ളക്കടവ് ജൈവവൈവിധ്യ മ്യൂസിയത്തിൽ നടന്ന പരിപാടിയില്‍ ജൈവവൈവിധ്യ ബോർഡ് ചെയർമാൻ ഡോ. എൻ അനിൽകുമാർ കുട്ടികളുമായി സംസാരിച്ചു. ജൈവവൈവിധ്യ സംരക്ഷണത്തിന്റെ പ്രാധാന്യം, പ്രകൃതി നിരീക്ഷണത്തിന്റെ ശാസ്ത്രീയ വശങ്ങൾ എന്നിവ അദ്ദേഹം പങ്കുവച്ചു. ‘വനസൗന്ദര്യം’ എന്ന വിഷയത്തിൽ വൈല്‍‍ഡ് ലൈഫ് ഫോട്ടോഗ്രാഫർ സാലി പാലോട് കുട്ടികള്‍ക്ക് ക്ലാസെടുത്തു. സ്കൂളുകളിലെ ജൈവവൈവിധ്യ ക്ലബ്ബുകളുടെ പ്രാധാന്യം റിസര്‍ച്ച് ഓഫീസർ ഡോ. അഖില എസ് നായര്‍ വിശദീകരിച്ചു. മ്യൂസിയം സൂപ്പർവൈസർ വിഷ്ണു, ജൈവവൈവിധ്യ ബോർഡിന്റെ സയന്റിഫിക് ഓഫീസർ ഡോ. വി ഉണ്ണികൃഷ്ണൻ, റിസര്‍ച്ച് ഓഫീസർ ഡോ. പ്രജിത്ത്, അധ്യാപകരായ ജ്യോതിസ്, അർച്ചന ഉണ്ണി, നിതിൻ, ഷൈജു, വിജി, വി അജയകുമാര്‍ എന്നിവര്‍ സംസാരിച്ചു.