ഇടവ എന്നും 
ഇടതുപക്ഷത്തിനൊപ്പം

വർക്കല

തുടർച്ചയായ 15 വർഷം എൽഡിഎഫ് ഭരണ നേതൃത്വത്തിലാണ് ഇടവ ഗ്രാമം. സമസ്ത മേഖലയിലും വികസനമാണ് ലക്ഷ്യം. കാർഷിക - പശ്ചാത്തല മേഖലകൾക്ക് പുത്തൻ ഉണർവേകി പഞ്ചായത്ത് ഭരണ സമിതിയും ജീവനക്കാരും ഒറ്റക്കെട്ടായി മുന്നേറുകയാണ്. വനിതാ ശക്തീകരണ മേഖലകളിൽ നിരവധി പദ്ധതികൾ നടപ്പാക്കി. ആരോഗ്യമേഖലയിലും മികച്ച ഇടപെടലാണ്‌ നടത്തുന്നത്‌. ഇടവ വെറ്റക്കട ഗവ. മുസ്ലിം അപ്പർ പ്രൈമറി സ്കൂളിൽ 16 ലക്ഷം രൂപ ചെലവിൽ ടോയ്‌ലറ്റ് ബ്ലോക്ക്, 10 ലക്ഷം ചെലവഴിച്ച് സ്മാർട്ട് ക്ലാസ് റൂം, 2 ലക്ഷം രൂപ ചെലവിൽ ലൈബ്രറി നവീകരണം,1.25 ലക്ഷം ചെലവഴിച്ച് ചുറ്റുമതിൽ എന്നിവ നിർമിച്ചു. പഞ്ചായത്ത് റോഡുകൾ മുഴുവൻ നവീകരിച്ചു. ചിലത് പുതുതായി നിർമിക്കുകയും ചെയ്തു. മത്സ്യത്തൊഴിലാളികൾക്ക് കട്ടമരം, ഫൈബർമരം, കമ്പവല, കുട്ടികൾക്ക് സ്കോളർഷിപ്പ്, പഠനമുറി മുതലായവ നൽകി. പട്ടികജാതി കുടുംബങ്ങൾക്ക് കുടിവെള്ളം, വൈദ്യുതി, ശൗചാലയം, വീട് മെയിന്റനൻസ്, പഠനമുറി, മേശ, - കസേര, വയോജനങ്ങൾക്ക് കട്ടിൽ, വാട്ടർ ടാങ്ക് മുതലായവ എത്തിച്ചിട്ടുണ്ട്. കാട്ടുവിള - ഊറ്റുകുഴി വാട്ടർ സപ്ലൈ സ്കീം, മാന്തറ- ചിറയിൽ കോട്ടയിൽ പാണി വാമനപുരം പദ്ധതി എന്നിവയിലൂടെ കുടിവെള്ള ലഭ്യതയും ഉറപ്പാക്കി. പഞ്ചായത്തിന് കീഴിലുള്ള മുഴുവൻ സ്കൂളുകളിലും പശ്ചാത്തല സൗകര്യം ഒരുക്കിയിട്ടുണ്ട്.