ഒരുങ്ങുന്നു ഡ്രൈവർമാരുടെ ഡാറ്റാ ബാങ്ക്‌

തിരുവനന്തപുരം

കോര്‍പറേഷന്റെ ജലവിതരണ, സെപ്റ്റേജ് സര്‍വീസിലെ ഡ്രൈ വര്‍മാരുടെ ഡാറ്റാ ബാങ്ക്‌ തയ്യാറാക്കും. പദ്ധതിക്ക്‌ കൗണ്‍സില്‍ യോഗം അനുമതി നല്‍‌കി. കോര്‍പറേഷൻ ലൈസൻസുള്ള വാഹനങ്ങളിലെ ഡ്രൈവർ, വർക്കർ എന്നിവരുടെ ഡാറ്റാ ബാങ്കാണ്‌ തയ്യാറാക്കുക. പൊലീസ് ക്ലിയറൻസ് സർട്ടിഫിക്കറ്റോടെ മുഖം തിരിച്ചറിയൽ സംവിധാനം (ഫേസ് റെക്കഗ്നിഷൻ) വഴിയാണ്‌ പദ്ധതി നടപ്പാക്കുക. പരാതിയും പ്രശ്നങ്ങളും കണ്ടെത്താനും അനധികൃത സര്‍വീസ്‌ നടത്തിയാൽ തിരിച്ചറിയാനും ഇതുവഴി സാധിക്കും. സ്മാർട്ട് ട്രിവാൻഡ്രം ആപ്പിലാണ് സംവിധാനം ഒരുക്കുന്നത്. കുടിവെള്ള, സെപ്റ്റേജ് സേവനങ്ങൾക്ക്‌ ബാങ്കിൽ പണം നേരിട്ടടയ്ക്കാനും സംവിധാനമൊരുക്കും. ഉപഭോക്താവിന് നേരിട്ടോ ചെ ക്ക് മുഖേനയോ പണമടയ്‌ക്കാം. ദിവസേനയുള്ള ട്രിപ്പുകളുടെയും പണം നൽകിയതിന്റെയും വിവരങ്ങള്‍ വാട്‌സാപ്പിലൂടെയും സ്മാര്‍ട്ട്സിറ്റി ആപ്പിലൂടെയും വാഹന ഉടമയ്ക്ക് അറിയാനുമാകും. വാഹനങ്ങളുടെ സർവീസ് ഗുണനിലവാരം നൽകുന്ന സ്റ്റാർ റേറ്റിങ്ങും നടപ്പാക്കും. ട്രാവൻസോഫ്റ്റ് സൊല്യൂഷൻ എന്ന സ്ഥാപനമാണ് ആപ്ലിക്കേഷൻ പരിഷ്കരിക്കാനുള്ള നിർദേശം നൽകിയത്‌.