എൽഡിഎഫ് സ്ഥാനാർഥിയുടെ ബോർഡ്‌ നശിപ്പിച്ച് ബിജെപി പ്രവർത്തകൻ

​വിളപ്പിൽ

എൽഡിഎഫ്‌ സ്ഥാനാർഥിയുടെ ബോർഡുകളും പോസ്റ്ററുകളും നശിപ്പിച്ച കേസിലെ പ്രതിയായ ബിജെപി പ്രവർത്തകനെ ജാമ്യത്തിലിറക്കി കോൺഗ്രസുകാർ. മലയിൻകീഴ് പഞ്ചായത്ത് മഞ്ചാടി വാർഡിലെ എൽഡിഎഫ് സ്ഥാനാർഥി ജെ രാധാകൃഷ്ണൻ നായരുടെ ബോർഡുകളും പോസ്റ്ററുകളുമാണ്‌ നശിപ്പിച്ചത്‌. വെള്ളി രാത്രിയാണ്‌ സംഭവം. ബിജെപി പ്രവർത്തകൻ മലയിൻകീഴ് സ്വദേശി ശങ്കറാണ്‌ ബോർഡുകൾ നശിപ്പിച്ചത്. മലയിൻകീഴ് പൊലീസ് സിസിടിവി ദൃശ്യങ്ങൾ കേന്ദ്രീകരിച്ച്‌ നടത്തിയ അന്വേഷണത്തിൽ കേസ് രജിസ്റ്റർ ചെയ്തു. എന്നാൽ, പ്രതിയെ സ്റ്റേഷൻ ജാമ്യത്തിലിറക്കാൻ കോൺഗ്രസ്‌ നേതാക്കളടക്കമാണ്‌ സ്റ്റേഷനിൽ എത്തിയത്‌. വിഷയത്തിൽ സിപിഐ എം പ്രതിഷേധ പ്രകടനം സംഘടിപ്പിച്ചു. എൽഡിഎഫ്‌ സ്ഥാനാർഥികൾക്ക് ജനങ്ങളിൽനിന്ന്‌ കിട്ടുന്ന അംഗീകാരമാണ് പ്രകോപനത്തിന് കാരണമെന്നും കോൺഗ്രസ്-–ബിജെപി കൂട്ടുകെട്ട്‌ അക്രമരാഷ്‌ട്രീയം അവസാനിപ്പിക്കണമെന്നും സിപിഐ എം ഏരിയ കമ്മിറ്റി അംഗം വി എസ്‌ ശ്രീകാന്തും ലോക്കൽ സെക്രട്ടറി സന്തോഷും പറഞ്ഞു.