വികസനം തുടരാൻ ചിറയിൻകീഴ്

പാലവിള സ്കൂളിൽ നിർമിച്ച പുതിയ കെട്ടിടം
ചിറയിൻകീഴ്
കടലും കായലും വയലും നിറഞ്ഞ് കേരളീയ ഗ്രാമസൗന്ദര്യം തുടിക്കുന്ന നാടാണ് ചിറയിൻകീഴ്. മലയാളത്തിന്റെ അതുല്യ താരചക്രവർത്തി പ്രേംനസീറിന്റെ നാട്. അഭിനയത്തിന്റെ പുതുവഴി വെട്ടിത്തീര്ത്ത് മലയാളസിനിമയെ ലോകശ്രദ്ധയിലെത്തിച്ച ഭരത് ഗോപിയുടെ ജന്മദേശം. അങ്ങനെ ഒരുപാട് ചരിത്രമുറങ്ങുന്നു ചിറയിൻകീഴില്. കമ്യൂണിസ്റ്റ് പാർടിക്ക് ശക്തമായ അടിത്തറയുള്ള പ്രദേശംകൂടിയാണ്. എല്ഡിഎഫ് പഞ്ചായത്ത് ഭരണസമിതികളുടെ വികസനമികവ് നാടിന്റെ ഖ്യാതി ഉയര്ത്താനായി. സിപിഐ എമ്മിന്റെയും തൊഴിലാളിവർഗത്തിന്റെയും സമുന്നതനേതാവായിരുന്ന ആനത്തലവട്ടം ആനന്ദൻ പഞ്ചായത്ത് അധ്യക്ഷപദം അലങ്കരിച്ചിട്ടുണ്ട്. പഞ്ചായത്ത് ഭരണത്തില് കഴിഞ്ഞ അഞ്ചുവർഷം ആരോഗ്യ, വിദ്യാഭ്യാസ, കാർഷിക, പശ്ചാത്തല, സേവന മേഖലകളിൽ മാതൃകാപരമായ വികസനമാണ് എല്ഡിഎഫ് നടത്തിയത്. പഞ്ചായത്തിന്റെ സ്വപ്നപദ്ധതി കമ്യൂണിറ്റി ഹാള് യാഥാര്ഥ്യമാക്കാനായി. ഊരാളുങ്കൽ സൊസൈറ്റി സഹകരണത്തോടെ ജ്യോഗ്രഫിക്കൽ ഇൻഫർമേഷൻ സിസ്റ്റം നടപ്പാക്കി മുഴുവൻ ഡാറ്റയും ഡിജിറ്റലാക്കി. കാർഷികമേഖലയിൽ വലിയ മുന്നേറ്റങ്ങളാണ് നടത്തിയത്. കർഷക കൂട്ടായ്മകളുടെ രൂപീകരണവും വിപണനസംവിധാനങ്ങളുംവഴി മേഖല സ്വയംപര്യാപ്തമാക്കി. കേരഗ്രാമം പദ്ധതിയിലൂടെ തെങ്ങുകൃഷി പ്രോത്സാഹിപ്പിച്ചു. നെൽകൃഷിക്കായി വിത്ത്–വളം സൗജന്യ വിതരണം നടത്തി. ആഴ്ചച്ചന്തകളിലൂടെ ജൈവോൽപ്പന്നങ്ങളുടെ വിപണനം, പുഷ്പകൃഷി എന്നിവ വിജയകരമായി നടപ്പാക്കി. ലൈഫ് പദ്ധതിയിലൂടെ 315 വീടുകൾ നിർമിച്ചുനൽകി നിരവധി കുടുംബങ്ങളുടെ സ്വപ്നം യാഥാര്ഥ്യമാക്കി. മത്സ്യത്തൊഴിലാളികള്ക്ക് പ്രത്യേകമായി 50 വീടുകളും പട്ടികജാതി മേഖലയ്ക്ക് 100 വീടുകളും നല്കി. ഭൂമിയില്ലാത്തവർക്ക് ഭൂമി വാങ്ങി വീട് നിർമിച്ചുനൽകുന്ന പദ്ധതി പുരോഗമിക്കുന്നു. പാലവിള, ശാർക്കര, പടനിലം സ്കൂളുകള്ക്ക് പുതിയ കെട്ടിടങ്ങള് നിര്മിച്ചു. ആരോഗ്യമേഖലയിൽ മാതൃകാപരമായ മാറ്റങ്ങള് വരുത്താന് സാധിച്ചു. മുഴുവൻ സബ് സെന്ററുകളിലും മരുന്ന് സൂക്ഷിക്കാൻ ശീതീകരണസംവിധാനം, പെരുമാതുറ ആരോഗ്യകേന്ദ്രത്തിന് പുതിയ കെട്ടിടം, പുതിയ ലാബ് എന്നിവ ഒരുക്കി. ആൽത്തറമൂട്ടിൽ വനിതാ ജിംനേഷ്യം സ്ഥാപിച്ചു. കരുന്ത്വകടവിൽ നീന്തൽക്കുളം, വയോജനങ്ങൾക്ക് പകൽവീട്, ഭിന്നശേഷിക്കാരായ കുട്ടികൾക്ക് ബഡ്സ് സ്കൂൾ റീഹാബിലിറ്റേഷൻ സെന്റർ എന്നിവയും നിര്മിച്ചു. ജനങ്ങളെ ചേര്ത്തുപിടിച്ച് ഭരണസമിതിയുടെ നാടിന്റെ വികസനം എല്ഡിഎഫിന് വീണ്ടും വലിയ പ്രതീക്ഷയാണ് നല്കുന്നത്.









0 comments