കംപ്യൂട്ടർ സെന്റർ ഉടമ പിടിയിൽ

തിരുവനന്തപുരം

മുൻഗണനാ റേഷൻകാർഡുകൾ (പിങ്ക്) വ്യാജമായി നിർമിച്ച് നൽകിയ കേസിൽ ഒരാൾകൂടി പിടിയിൽ. ബീമാപള്ളി ബിഎഫ്എ ജങ്ഷൻ അസീസ് മൻസിലിൽ ഹസീബ് ഖാൻ (34) നെയാണ് പിടികൂടിയത്. വീടിനോടുചേർന്ന് കംപ്യൂട്ടർ സെന്റർ നടത്തുന്നയാളാണ് ഹസീബ് ഖാൻ. കേസിൽ നേരത്തേ പിടിയിലായ ബീമാപള്ളിയിലെ 234–ാം നമ്പർ റേഷൻകട ലൈസൻസി സഹദ് ഖാനൊപ്പം (32) ചേർന്നാണ് ഇയാൾ തട്ടിപ്പ് നടത്തിയത്. ഹസീബ് ഖാനിൽനിന്ന് ഇതിന്റെ രേഖകളടക്കം പിടികൂടിയിട്ടുണ്ട്. റിമാൻഡ് ചെയ്ത പ്രതിയെ കൂടുതൽ ചോദ്യം ചെയ്യുന്നതിനായി കസ്റ്റഡിയിൽ വാങ്ങും. സംഭവത്തിലെ മുഖ്യപ്രതി സുൽഫിക്കറിനായി പൊലീസ് തിരച്ചിൽ നടത്തുകയാണ്. ഭക്ഷ്യവകുപ്പിന്റെ മാനേജിങ്‌ സിസ്‌റ്റത്തിൽ ഉദ്യോഗസ്ഥരുടെ പാസ്‌വേർഡും ലോഗിൻഐഡിയും കൈക്കലാക്കിയാണ് ഇവർ തട്ടിപ്പ് നടത്തിയതെന്നാണ് നിഗമനം. 146 വ്യാജ മുൻഗണനാ റേഷൻകാർഡുകളാണ്‌ ബീമാപള്ളി സ്വദേശി സഹദ്‌ഖാന്റെ നേതൃത്വത്തിൽ പ്രിന്റ്‌ ചെയ്‌ത്‌ നൽകിയത്‌. റേഷൻ മാനേജിങ്‌ സിസ്‌റ്റത്തിൽ കയറാൻ ഉപയോഗിച്ച കംപ്യൂട്ടറിന്റെ ഐപി അഡ്രസ്‌ ഭക്ഷ്യവകുപ്പ്‌ കേസ്‌ അന്വേഷണം നടത്തുന്ന വഞ്ചിയൂർ പൊലീസിന്‌ കൈമാറിയിട്ടുണ്ട്‌. പൂന്തുറയിലെ കുടുംബത്തിന്‌ തോന്നിയ സംശയമാണ്‌ വ്യാജ മുൻഗണനാ റേഷൻ കാർഡ്‌ അന്വേഷണത്തിലേക്ക്‌ നയിച്ചത്‌. വെളള, നീല കാർഡിലുള്ളവരെ ഒരുബന്ധവുമില്ലാത്തവരുടെ മുൻഗണനാ കാർഡിൽ (പിങ്ക്‌ കാർഡ്‌) ഉൾപ്പെടുത്തി പുതിയ റേഷൻകാർഡിന്‌ അപേക്ഷ നൽകിയാണ് തട്ടിപ്പ്. റേഷൻകാർഡ്‌ ഉണ്ടാക്കി നൽകാൻ പ്രതികൾ വാങ്ങിയത്‌ 1000 മുതൽ 3000 രൂപവരെയാണ്.