ദുരിതത്തിലും കുടുംബത്തെ വേട്ടയാടി ബിജെപി ബാങ്ക്‌

നെടുമങ്ങാട്

ദുരന്തങ്ങൾ ഒന്നൊഴിയാതെ പിന്തുടരുന്ന കുടുംബത്തിന്റെ അവസാന പ്രതീക്ഷയിലും ആണിയടിച്ച്‌ ബിജെപി – ആർഎസ്‌എസ്‌ ഭരണത്തിലെ ബാങ്ക്‌. കിടപ്പിലായ ഉമ്മയുടെയും സഹോദരന്റെയും ദൈനംദിന ആവശ്യങ്ങൾ കൂട്ടിമുട്ടിക്കാൻ കഷ്‌ടപ്പെടുന്ന യുവാവിനാണ്‌ അനന്തപുരം സഹകരണസംഘത്തിന്റെ കുടിയിറക്കൽ നടപടി. ആനാട് പഞ്ചായത്ത്‌ ഇര്യനാട് തടത്തരികത്തു വീട്ടിൽ മൻസൂർ (38) സഹോദരന്റെ ചികിത്സാർഥം മൂന്നുലക്ഷം രൂപയാണ്‌ ലോണെടുത്തത്‌. വട്ടിയൂർക്കാവിൽ പ്രവർത്തിക്കുന്ന ടി 184–-ാം നമ്പർ അനന്തപുരം സഹകരണ സംഘത്തിൽനിന്നെടുത്ത ലോൺ ജീവിത സാഹചര്യം മോശമായതിനെത്തുടർന്നാണ്‌ തിരിച്ചടയ്‌ക്കാൻ സാധിക്കാതായത്‌. മൻസൂറിന്റെ ഉമ്മ മസൂനത്ത് ബീഗമാണ്‌ (72) വൃക്കസംബന്ധമായ അസുഖത്തെ തുടർന്ന് ആദ്യം കിടപ്പിലായത്‌. അധികം വൈകാതെ ഹൃദയ വാൽവ് തകരാറിലായി വാപ്പയും കിടപ്പിലായി. അടുത്തടുത്ത വർഷങ്ങളിൽ വാപ്പയുടെ വൃദ്ധമാതാപിതാക്കളും കിടപ്പിലായി. രണ്ടുവർഷം മുമ്പ്‌ വാപ്പയും വൃദ്ധമാതാപിതാക്കളും മരിച്ചു. മൻസൂറും സഹോദരൻ മാഹീനും ചേർന്ന് കൂലിവേല ചെയ്താണ് കുടുംബം പരിപാലിച്ചിരുന്നത്. കരൾ സംബന്ധമായ അസുഖത്തെ തുടർന്ന് ഏതാനും വർഷംമുമ്പ് മാഹീനും (43) കിടപ്പിലായി. തുടർന്ന്‌ കുടുംബത്തെ നോക്കാൻ ഗത്യന്തരമില്ലാതെ മൻസൂർ നാട്ടുകാരുടെ സഹായം തേടി. സുഹൃത്തുക്കളുടെ സന്മനസ്സിൽ കരൾമാറ്റിവയ്ക്കൽ ശസ്ത്രക്രിയ നടത്താൻ ധാരണയായി. ഇതിനായാണ്‌ സംഘപരിവാർ നിയന്ത്രണത്തിലെ ബാങ്കിൽനിന്ന്‌ ലോണെടുത്തത്‌. ഏതാനും മാസങ്ങൾക്കുമുമ്പ്‌ കരൾ മാറ്റിവയ്ക്കൽ ശസ്ത്രക്രിയ നടന്നു. എന്നാൽ പ്രാരാബ്‌ധങ്ങൾക്കിടയിൽ ലോണടവ് മുടങ്ങി. കൂലിപ്പണി ചെയ്‌ത്‌ കുടുംബം പോറ്റാൻ ശ്രമിച്ചെങ്കിലും മരുന്നിനും ചെലവിനും ഉള്ളതുപോലും കണ്ടെത്താനാകാത്ത സ്ഥിതിയായി. സ്വന്തമായുള്ള അഞ്ചുസെന്റ് പുരയിടത്തിൽ ഇ എം എസ് ഭവന പദ്ധതിപ്രകാരം വച്ച വീട്ടിലാണ് കുടുംബം കഴിയുന്നത്‌. അരക്ഷിതാവസ്ഥയിലുള്ള കുടുംബത്തിനാണ്‌ രണ്ടുദിവസം മുമ്പ്‌ ലോൺ കുടിശ്ശികയുടെ പേരിൽ ബാങ്കധികൃതർ കുടിയിറക്കൽ നോട്ടീസ്‌ നൽകിയത്. കാലാവധി നീട്ടിച്ചോദിച്ചെങ്കിലും ലഭിച്ചില്ല. ഒരാഴ്ചയ്ക്കുള്ളിൽ വീടും സ്ഥലവും ഒഴിയാനാണ്‌ താക്കീത്‌. കിടപ്പു രോഗികളെയുംകൊണ്ട് എങ്ങോട്ടുപോകണമെന്നറിയാത്ത അവസ്ഥയിലാണ്‌ മാഹീൻ.