‘പ്രകൃതിയോടൊപ്പം ഒരു അറിവുദിനം’: ഗിഫ്റ്റഡ് സ്റ്റുഡന്റ്‌സിന് പ്രത്യേക പരിപാടി സംഘടിപ്പിച്ചു

തിരുവനന്തപുരം: തിരുവനന്തപുരം, ആറ്റിങ്ങൽ വിദ്യാഭ്യാസ ജില്ലകളിലെ ഗിഫ്റ്റഡ് സ്റ്റുഡന്റ്‌സിന് ജൈവവൈവിധ്യത്തെക്കുറിച്ച് സമഗ്രമായ അറിവ് നൽകുന്ന ‘പ്രകൃതിയോടൊപ്പം ഒരു അറിവുദിനം’ എന്ന പ്രത്യേക പരിപാടി വള്ളക്കടവ് ജൈവവൈവിധ്യ മ്യൂസിയത്തിൽ സംഘടിപ്പിച്ചു. അധ്യാപകരും കുട്ടികളും ഉള്‍പ്പെടെ നൂറോളം പേര്‍ പരിപാടിയില്‍ പങ്കെടുത്തു.

കേരള സംസ്ഥാന ജൈവവൈവിധ്യ ബോർഡ് ചെയർമാൻ ഡോ. എൻ അനിൽകുമാർ കുട്ടികളുമായി സംവദിച്ചുകൊണ്ടാണ് പരിപാടിക്ക് തുടക്കമായത്. ജൈവവൈവിധ്യ സംരക്ഷണത്തിന്റെ പ്രാധാന്യം, പ്രകൃതി നിരീക്ഷണത്തിന്റെ ശാസ്ത്രീയ വശങ്ങൾ എന്നിവ അദ്ദേഹം പങ്കുവെച്ചു.

‘വനസൗന്ദര്യം’ എന്ന വിഷയത്തിൽ പ്രശസ്ത ലൈഫ് ഫോട്ടോഗ്രാഫർ സാലി പാലോട് കുട്ടികള്‍ക്ക് ക്ലാസ്സെടുത്തു. കാട്ടിലെ രംഗങ്ങൾ ക്യാമറയിൽ പകർത്തുമ്പോളുണ്ടായിട്ടുള്ള അനുഭവങ്ങൾ, പ്രകൃതിയെയും ജീവജാലങ്ങളെയും പകർത്തുമ്പോൾ പാലിക്കേണ്ട ഉത്തരവാദിത്വങ്ങൾ എന്നിവ അദ്ദേഹം വിശദീകരിച്ചു.

സ്ക്കൂളുകളിലെ ജൈവവൈവിധ്യ ക്ലബ്ബുകളുടെ പ്രാധാന്യം റിസര്‍ച്ച് ഓഫീസർ ഡോ. അഖില എസ് നായര്‍ വിശദീകരിച്ചു. Science on Sphere പ്രദർശനം ഉൾപ്പെടെയുള്ള മ്യൂസിയത്തിലെ പ്രത്യേക ശേഖരങ്ങളും റിയൽ ടൈം ഡാറ്റാ പ്രദർശന രീതികളും മ്യൂസിയം സൂപ്പർവൈസർ വിഷ്ണു വിദ്യാർഥികൾക്ക് പരിചയപ്പെടുത്തി. ഭൂമിയിലെ കാലാവസ്ഥ മാറ്റങ്ങൾ, സമുദ്ര ബയോളജി, ഗ്ലോബൽ എൻവയ്റോണ്മെന്റൽ ഡാറ്റ തുടങ്ങിയവ കുട്ടികൾക്ക് ആകർഷക അനുഭവമായി.

ജൈവവൈവിധ്യ ബോർഡിന്റെ സയന്റിഫിക് ഓഫീസർ ഡോ. വി ഉണ്ണികൃഷ്ണൻ, റിസര്‍ച്ച് ഓഫീസർ ഡോ. പ്രജിത്ത്, അധ്യാപകരായ ജ്യോതിസ്, അർച്ചന ഉണ്ണി, നിതിൻ, ഷൈജു, വിജി, അജയകുമാര്‍ വി എന്നിവർ പരിപാടിയിൽ പങ്കെടുത്തു.