അജിന്റെ വിജയം
കൊതിച്ച്‌ വോട്ടർമാർ

തിരുവനന്തപുരം

തൃക്കണ്ണാപുരം വാർഡിൽ എൽഡിഎഫ് സ്ഥാനാർഥി അജിൻ എസ് എല്ലിന്റെ തിരിച്ചുവരവിന്‌ കാത്തിരിക്കുകയാണ് വോട്ടർമാർ. 10 വർഷമായി ഇവിടെ വിജയിക്കുന്ന ബിജെപിയുടെ ക‍ൗൺസിലർമാർ നാടിന്റെ വികസനത്തിന്‌ ഒന്നും ചെയ്യാത്തതിന്റെ പരാതിയുണ്ട്‌ ജനങ്ങൾക്ക്‌. 2015 വരെ ക‍ൗൺസിലറായിരുന്ന എൽഡിഎഫിന്റെ അജിൻ എസ്‌ എൽ വീണ്ടും ജനവിധി തേടുന്നത്‌ വോട്ടർമാരിൽ ആവേശം വിതയ്ക്കുകയാണ്‌. 2010–15 കാലഘട്ടത്തിൽ അജിൻ ക‍ൗൺസിലറായിരിക്കവേ 60ഓളം കുടുംബശ്രീ യൂണിറ്റുകൾ രൂപീകരിച്ച്‌ അഞ്ച്‌ സ്വയം തൊഴിൽ യൂണിറ്റുകൾ ആരംഭിച്ച്‌ 200ലധികം സ്ത്രീകൾക്ക്‌ വരുമാനമുണ്ടായി. പിന്നീട്‌ വിജയിച്ച ബിജെപി ക‍ൗൺസിലർമാർ ഇത്തരം പ്രവർത്തനങ്ങൾക്ക്‌ പ്രാധാന്യം നൽകിയിരുന്നില്ല. വാർഡിന്റെ വികസനത്തിനും ജനങ്ങളുടെ അഭിവൃദ്ധിക്കുംവേണ്ടി മുന്നിലുണ്ടാകുമെന്ന്‌ അജിൻ പറയുന്നു. ബിജെപിയുടെ അവഗണനയിൽ ജീവിതം അവസാനിപ്പിച്ച മുൻ ക‍ൗൺസിലർ തിരുമല അനിൽ, ആർഎസ്‌എസ്‌ നേതാവായിരുന്ന ആനന്ദ്‌ കെ തന്പി എന്നിവരുടെ വേർപാടിൽനിന്ന്‌ നാട്‌ മുക്തമായിട്ടില്ല. ഇരുവരുടെയും വീടും കുടുംബാംഗങ്ങളും ധാരാളമുള്ള മേഖലയാണ്‌ വാർഡിലെ ഏഴാം ബൂത്ത്‌. ഇരുവരുടെയും മരണത്തിന്‌ പകരംവീട്ടലുകൂടിയായിരിക്കും തൃക്കണ്ണാപുരത്തെ വോട്ടർമാരുടെ വിധിയെഴുത്ത്‌. എസ്‌എഫ്‌ഐയിലൂടെ പൊതുരംഗത്ത്‌ സജീവമായ അജിൻ എസ്‌ എൽ യൂണിവേഴ്‌സിറ്റി കോളേജ്‌ യൂണിയൻ ചെയർമാൻ, ജനറൽ സെക്രട്ടറി, കേരള സർവകലാശാല അക്കാദമിക്‌ ക‍ൗൺസിൽ അംഗം എന്നീ നിലകളില്‍ പ്രവര്‍ത്തിച്ചു.