ഇ‍ൗ പഞ്ചായത്തുകൾ പറയും ദുരനുഭവം

തിരുവനന്തപുരം

തദ്ദേശഭരണം ബിജെപിക്ക്‌ ലഭിച്ചാൽ നാടിന്റെ വികസനം മുരടിക്കുമെന്നതിന്‌ ഉദാഹരണമായി ജില്ലയിൽ മൂന്ന്‌ പഞ്ചായത്തുണ്ട്‌. കല്ലിയൂർ, കള്ളിക്കാട്‌, കരവാരം പഞ്ചായത്തുകളാണിവ. കഴിഞ്ഞ തെരഞ്ഞെടുപ്പിൽ ബിജെപിക്കു ലഭിച്ച ഭരണം ഇ‍ൗ പഞ്ചായത്തുകളെ പതിറ്റാണ്ടുകൾ പിന്നിലേക്കാണ്‌ തള്ളിവിട്ടത്‌. ലഭിച്ച ഭരണം അഴിമതിക്കുള്ള അവസരമാക്കി. തമ്മിലടിയും പാരവയ്‌പും മുർച്ഛിച്ചപ്പോൾ സഹികെട്ട്‌ ചിലർ ബിജെപി വിട്ടു. കരവാരത്ത്‌ ബിജെപിക്ക്‌ ഭരണം നഷ്ടമായി. കരവാരത്ത്‌ സ്ഥിരംസമിതി അധ്യക്ഷയടക്കം രണ്ട്‌ ബിജെപി അംഗങ്ങളാണ്‌ രാജിവച്ച്‌ പടിയിറങ്ങിയത്‌. ഇവർ സിപിഐ എമ്മുമായി സഹകരിക്കാനാണ്‌ തീരുമാനിച്ചത്‌. ഇരുവാർഡിലും നടന്ന ഉപതെരഞ്ഞെടുപ്പിൽ എൽഡിഎഫ്‌ വിജയിച്ചതോടെ ബിജെപിക്ക്‌ ഭരണം നഷ്ടമായി. 2023ൽ എൽഡിഎഫ് കൊണ്ടുവന്ന അവിശ്വാസപ്രമേയത്തിലൂടെയാണ്‌ കല്ലിയൂരിൽ ബിജെപിക്ക്‌ ഭരണം നഷ്‌ടമായത്‌. വർഷങ്ങളായി തരിശുകിടന്ന പണ്ടാരക്കരി, കാഞ്ഞിരത്തടി പാടശേഖരങ്ങളിൽ ബ്ലോക്ക് പഞ്ചായത്ത്‌ സഹകരണത്തോടെ കൃഷി പുനരാരംഭിച്ചത്‌ എൽഡിഎഫ്‌ ഭരണത്തിൽ വന്നതോടെയാണ്‌. വയോജന സൗഹൃദ പഞ്ചായത്തായി പ്രഖ്യാപിച്ചു. കാർബൺ ന്യൂട്രൽ കല്ലിയൂർ പദ്ധതി നടപ്പാക്കി. വെള്ളായണി കായൽ ശുദ്ധീകരണത്തിന് 96.5 കോടിയും കാക്കാമൂല–-കാർഷിക കോളേജ് പാലം നിർമാണത്തിന് 30 കോടിയും അനുവദിച്ചു. കിരീടം പാലത്തിന്റെ ഭാഗമായി ടൂറിസം വകുപ്പ് 1.25 കോടി ചെലവിട്ട് നടപ്പാക്കുന്ന സിനിമാ ടൂറിസം പദ്ധതി അവസാനഘട്ടത്തിലാണ്. സംസ്ഥാന സർക്കാരിന്റെ ഭരണത്തിനുകീഴിൽ കേരളമാകെ വികസനമെത്തുന്പോൾ കാഴ്‌ചക്കാരായി നിൽക്കാനേ കള്ളിക്കാടിന്‌ കഴിഞ്ഞുള്ളൂ. സ്‌കൂളുകളിൽ പ്രഭാതഭക്ഷണം എത്തിക്കാനായില്ല. കുട്ടികളുടെ അവധിക്കാല കായിക പരിശീലനം ഇല്ലാതാക്കി. ലക്ഷംവീട്‌ ഭവനപുനരുദ്ധാരണം നിലച്ചു. ഉന്നതവിജയികൾക്ക്‌ നൽകിയിരുന്ന ബാലകൃഷ്‌ണപിള്ള മെമ്മോറിയൽ ഗോൾഡ്‌ മെഡൽ രാഷ്‌ട്രീയ വൈരാഗ്യത്തിന്റെ പേരിൽ നിർത്തി. വയോജനങ്ങൾക്ക്‌ നൽകിയിരുന്ന സ‍ൗജന്യമരുന്നുകളും നിർത്തലാക്കി. ഇതിനുള്ള ഫണ്ട്‌ ട‍ൂർ പ്രോഗ്രാമാക്കി തട്ടിയെടുത്തു. എംഎൽഎയും സർക്കാരിന്റെ ബജറ്റിലും അനുവദിച്ച പൊതുമരാമത്ത്‌ റോഡല്ലാതെ സഞ്ചാരയോഗ്യമായ ഒരു പഞ്ചായത്ത്‌ റോഡ്‌ പോലുമില്ല. ആദിവാസി ഉന്നതികളുള്ള പഞ്ചായത്തായിട്ടും ക്ഷേമ പദ്ധതികളില്ല. ജില്ലയിലെ ഏറ്റവും പിന്നാക്കം നിൽക്കുന്ന പഞ്ചായത്തായി കള്ളിക്കാടിനെ മാറ്റി.