വികസനക്കുതിപ്പിന്റെ പാറശാല മാതൃക

പാറശാല

കേരളത്തിന്റെ തെക്കേയറ്റമായ പാറശാലയിൽ തമിഴ്നാട് സംസ്ഥാന അതിർത്തിയോട് ചേർന്നുകിടക്കുന്ന ആറു പഞ്ചായത്തുകൾ ഉൾപ്പെടുന്ന ഗ്രാമീണ തീരദേശമേഖലയാണ് പാറശാല ബ്ലോക്ക് പഞ്ചായത്ത്. കഴിഞ്ഞ അഞ്ചുവര്‍ഷം എല്‍ഡിഎഫ് ഭരണസമിതി നാട്ടിലുണ്ടാക്കിയ സമാനതകളില്ലാത്ത വികസനം തുടര്‍ഭരണത്തിന് വലിയ പ്രതീക്ഷ നല്‍കുന്നു. 2020ലെ തെരഞ്ഞെടുപ്പിൽ 14 ഡിവിഷനിൽ 13ലും മികച്ച വിജയം നേടിയായിരുന്നു അധികാരത്തിലെത്തിയത്. സംസ്ഥാനത്തിന് മാതൃകയാകുന്ന നിരവധി വികസനപ്രവർത്തനങ്ങളാണ് നടപ്പാക്കിയത്. ജനകീയ ഇടപെടലുകളിലൂടെ ജനങ്ങളെയാകെ വികസനത്തിന്റെ ഭാഗമാക്കി. ഒപ്പം ജനങ്ങൾ ആഗ്രഹിച്ച പദ്ധതികളും നടപ്പാക്കി എസ് കെ ബെൻഡാർവിൻ പ്രസിഡന്റായ ഭരണസമിതി മറ്റ്‌ ബ്ലോക്കുകള്‍ക്കുകൂടി മാതൃകയായി. ഭരണസമിതിയും ഉദ്യോഗസ്ഥരും ഒപ്പം ജനങ്ങളും ഒത്തുചേര്‍ന്നുള്ള പ്രവർത്തനം നേട്ടങ്ങള്‍ക്ക് കരുത്തായി. പാറശാല, കാരോട്, കുളത്തൂർ, തിരുപുറം, പൂവാർ, ചെങ്കൽ പഞ്ചായത്തുകളാണ് ബ്ലോക്കിനു കീഴിലുള്ളത്. ഇവരുടെ സഹകരണവും കുതിപ്പിന് വേഗംപകര്‍ന്നു. ‘രോഗമില്ലാത്ത ഗ്രാമം’ പദ്ധതി സാധാരണ ജനങ്ങൾക്ക് വലിയ ആശ്വാസമായി. പദ്ധതി ആരോഗ്യരംഗത്ത് ഗ്രാമീണ ജനതയ്ക്കിടയിൽ ആരോഗ്യ സംരക്ഷണത്തിനെക്കുറിച്ചുള്ള അവബോധം സൃഷ്ടിക്കുകമാത്രമല്ല, രോഗം തടയാനുള്ള മുൻകരുതലുംകൂടിയായി. വിദ്യാഭ്യാസ കലാകായിക രംഗത്ത് മികവുപുലർത്തിയ ആയിരത്തോളം വിദ്യാർഥികളെ അക്ഷരസുകൃതം പരിപാടിയിലൂടെ വർഷംതോറും ആദരിച്ചു. കർണാടക സംഗീതജ്ഞ പത്മശ്രീ പാറശാല പൊന്നമ്മാളിന്റെ നാമധേയത്തിൽ സംഗീതപുരസ്കാരവും ഏര്‍പ്പെടുത്തി. ​ജനകീയ പുസ്തകശേഖരണത്തിലൂടെ പാറശാല പൊന്നമ്മാൾ സ്മാരക ലൈബ്രറിയും ആരംഭിച്ചു. വിദ്യാർഥികൾക്കായി ഉണർവ് പദ്ധതിയിലൂടെ ലഹരിവിരുദ്ധ പാർലമെന്റും ബോധവൽക്കരണവും നടത്തി. രക്ഷിതാക്കളെയും വിദ്യാർഥികളെയും അധ്യാപകരെയും തമ്മിൽ ബന്ധിപ്പിച്ചുള്ള മൊബൈൽ ആപ്ലിക്കേഷനും ജനശ്രദ്ധ നേടി. ഹരിതവിദ്യാലയ പ്രഖ്യാപനം സംസ്ഥാനത്ത് ആദ്യം നടത്തിയത് പാറശാല ബ്ലോക്ക് പഞ്ചായത്തായിരുന്നു. ശാരീരിക–മാനസിക വെല്ലുവിളികൾ നേരിടുന്നവരെ ചേർത്തുപിടിച്ച് ഭിന്നശേഷിസൗഹൃദ ബ്ലോക്ക് പഞ്ചായത്തായി. ഓട്ടിസം ബാധിച്ച കുഞ്ഞുമക്കളുടെ മികവ് പരിപാടിയും ഹസ്തം സൗജന്യ സ്പീച്ച് ബിഹേവിയർ തെറാപ്പി സെന്ററും ജനകീയ ഇടപെടലിന്റെ ഉദാഹരണങ്ങളാണ്. ​സ്ത്രീശാക്തീകരണത്തിനായി വലിയ മുന്നേറ്റം നടത്തി. സൗജന്യ ജിംനേഷ്യം, റിലാക്സ് എന്ന പേരിൽ സൗജന്യ യോഗ പരിശീലനം, അക്ഷരദീപം എന്ന പേരിൽ വായനശാലകൾക്ക് സഹായം, മത്സ്യത്തൊഴിലാളികള്‍ക്ക് വല വാങ്ങാൻ കൈത്താങ്ങ് പദ്ധതി, ക്യാൻസർ രോഗികൾക്ക് തുണ എന്ന പേരിൽ മരുന്നുവിതരണം എന്നിവ മാതൃകാ പദ്ധതികളാക്കി. തൊഴിലന്വേഷകർക്ക് നടത്തിയ തൊഴിൽമേള, പൂവിളി പുഷ്പകൃഷി തുടങ്ങിയവയെല്ലാം ബ്ലോക്കിന് വലിയ കൈയടി നേടാനായി. മുന്‍ മുഖ്യമന്ത്രി വി എസ് അച്യുതാനന്ദന്റെ സ്മരണയ്ക്കായി ബ്ലോക്ക് പഞ്ചായത്തിൽ ഹാൾ സ്ഥാപിച്ചു. പുതുതായി പൊൻവിള ഡിവിഷനുൾപ്പെടെ 15 ഡിവിഷനുകളാണ് നിലവിലുള്ളത്. ബ്ലോക്ക് പഞ്ചായത്ത് നടപ്പാക്കിയ വികസനപ്രവർത്തനങ്ങളും ഇടതുപക്ഷ സർക്കാർ നടപ്പാക്കിയ ക്ഷേമപദ്ധതികളും സമാനതകളില്ലാത്ത വികസനങ്ങളാണ് നാടിന് കഴിഞ്ഞ അഞ്ചുവര്‍ഷം സമ്മാനിച്ചത്. ഇതെല്ലാം എൽഡിഎഫ് സ്ഥാനാർഥികൾക്ക് തെരഞ്ഞെടുപ്പുപ്രചാരണത്തില്‍ കരുത്തും ആത്മവിശ്വാസവും നല്‍കുന്നു.