ചാലക്കാരുടെ 
സുന്ദറണ്ണൻ

തിരുവനന്തപുരം

ചാല കമ്പോളത്തിലെ തൊഴിലാളികളോട് വോട്ട് തേടിയാണ് എല്‍ഡിഎഫ് സ്ഥാനാര്‍ഥി അഡ്വ. എസ് എ സുന്ദറിന്റെ ദിവസത്തിന്റെ തുടക്കം. വ്യാഴാഴ്ച തന്റെ സ്കൂട്ടര്‍ നിർത്തിയിട്ട്‌ കമ്പോളത്തിലേക്ക് കയറാന്‍ തുടങ്ങുന്നതിനിടെയാണ് പിറകിലൊരു തൊഴിലാളിയുടെ സൈക്കിള്‍ മറിഞ്ഞത്. സൈക്കിളില്‍‌ വലിയ രണ്ട് ചാക്കുകെട്ടുമായി പോകുമ്പോഴായിരുന്നു അപകടം. ഞൊടിയിടയില്‍ ബ്ലോക്കാകുന്ന ചാലയില്‍, അവിടെ കൂടിനിന്ന രണ്ടുപേര്‍ക്കൊപ്പം ആ ചാക്ക് ഉയര്‍ത്തി നല്‍കാന്‍ സ്ഥാനാര്‍ഥിയുമുണ്ടായി. ചാലക്കാരുടെ സുന്ദറണ്ണൻ... ചാലക്കാര്‍ക്ക് എസ് എ സുന്ദര്‍ പുതുമുഖം അല്ല. ചാലയുടെ ഓരോ തുടിപ്പും അറിഞ്ഞ പ്രിയ സഖാവാണ്. 10 വര്‍ഷം സിപിഐ എം ചാല ഏരിയ സെക്രട്ടറിയായിരുന്ന നേതാവ്. പാര്‍ടി ജില്ലാ കമ്മിറ്റിയംഗവും സിഐടിയു ജില്ലാ സെക്രട്ടറിയുമാണ്. ആറ്റുകാല്‍ വാര്‍ഡിന്റെ കൗണ്‍സിലറായിരുന്ന സുന്ദര്‍ കോര്‍പറേഷന്‍ ക്ഷേമ സ്ഥിരം സമിതി അധ്യക്ഷനുമായിരുന്നു. എസ്എഫ്ഐ ജില്ലാ വൈസ് പ്രസിഡന്റ്, ഡിവൈഎഫ്ഐ ജില്ലാ ജോയിന്റ് സെക്രട്ടറി എന്നീ ചുമതലകളും സുന്ദറിന്റെ കൈയില്‍ ഭദ്രം. "ചാല തൊഴിലാളികളുടെ സ്ഥലമാണ്, തൊഴിലാളി കുടുംബങ്ങളാണ് ഇവിടുത്ത വോട്ടര്‍മാര്‍. അതുകൊണ്ട് തന്നെ തൊഴിലാളികൾക്ക് വിശ്രമകേന്ദ്രങ്ങളും വിനോദ കേന്ദ്രങ്ങളും നിർമിക്കും. ചാലയുടെ ചേല് കുറയ്ക്കുന്നത് വെള്ളക്കെട്ടാണ്. ഇത് പരിഹരിക്കാന്‍ ഓടകള്‍ നിര്‍മിക്കുകയും നവീകരിക്കുകയും വേണം. സ്മാര്‍ട്ട്സിറ്റി പദ്ധതിയിലെ റോ‍ഡുകള്‍ മാത്രമെ നിര്‍മിച്ചിട്ടുള്ളൂ. ബാക്കി റോഡുകളെ ബിജെപി കൗണ്‍സിലര്‍ പരിഗണിച്ചിട്ടില്ല. ചാലയുടെ ആവശ്യങ്ങള്‍ പരിഗണിച്ചുള്ള മാറ്റങ്ങള്‍ കൊണ്ടുവരും' – സുന്ദറണ്ണന്റെ ഉറപ്പ്.